Helikopteri ajornartoornermi mittariaqarpoq
Air Greenlandip helikopteriisa ilaat S-61 18-inik issimasulik Narsuarsuarmiit Narsaliarnermini Narsarsuarmut utertariaqarpoq motoorip aappaata kissattuulersoq ilimanartoqalermat.
Ippassaq Narsarsuarmiit Narsamut timmitilluni helikopterip naalagaata motoorip aappa unitsiinnartariaqarpaa taanna kissattuulerunarmat.
Helikopterilu oqimaatsunik useqarmat motoorilu ataasiinnaq atorlugu mittussalluni naalagaa Narsamut ingerlaannarusunngilaq, Narsarsuarmulli uterluni tassani mittarfimmi assakaasut atorlugit siumut ingerlalluni mittoqarsinnaammat. Narsami taamaattoqarsinnaanngilaq mittarfia heliport-iinnaammat.
Timmisartorneq minnerlu pissanganartortaqaratik ingerlapput taamaattoqartillugulu periutsit malillugit ingerlalluneqarlutik. Oqimaatsunik useqarnera assakaasullu atorlugit minneq pissutigalugit ilaasut minnermik nalinginnarmit sakkortunerusumik misigaat, airgreenland allappoq.
Ilaasut 18-it kingorna helikopterip naalagaanit pisumik paasissutissinneqarput. Ilaasut 18-it ilaat 14-it pingasunngornermi novembarip 10-anni Bell 212-imik sumunngarfimminnut ingerlanneqarput, sinnerilu sisamat sisamanngornermi novembarip 11-ianni assartukkat ilanngullugit ingerlateqqinneqassasut.