Sakkutuujusimasut nunarput eqqaaniarpaat

Assat eqisaluttut untritilippassuit sapaatip akunnerata naanerani Kalaalit Nunaata assinga sammivaat nuannaarlutillu issittumiissimanertik oqaluttuaralugu.

Tamanna pivoq USA-p sorsunnersuarmi sakkutuujusimasunut ullorititaani.

Sorsunnersuarmi kingullermi amerikarmiut tusintilippassuit nunatsinni sumi tamaani sakkutooqarfinni sulipput. Iliuuseqarsimanerat sammineqarluartartoq sakkutuujusimasut ukiumut ataasiarlutik naapikkaangata. Pingaartumik pissutigalugu amerikarmiut amerlanerpaartaat kiannerujussuarmi sorsoqataasarsimammata Asiami Frankrigimiluunniit.

Taamaattumik tusarnaartorpassuaqartarpoq assersuutigalugu 92-inik ukiullip Thomas J. Millerip 1945-mi Narsarsuarmi sakkutooqarfimmi radiulerisutut misigisani oqaluttuarigaangagit. Sapaatip akunneranut ulluni arfineq-marlunni ullormut akunnerni arfinilinni radiot arfineq-marluk atorlugit radiokut attaveqaqatigiinnerit naalaartarsimavai.

Ullut ilaanni Thomas J. Millerip iligiit sakkutuuannit timmisartortartumit ikioqqulluni kalerrisaarineq tusaavaa. Timmisartortartorli Casablancap eqqaani timmisartorsimavoq kiattup anorersuanut pulasimalluni sumiiffeerutivissimalluni.

- Nunarsuarmi kisiartaallunga kalerrisaarinera tusarsimavara sumiiffianillu paasissutississinnaasimavara. Timmisartortartup tupaallaatigisoujussuuvaa Kalaalit Nunaannit tusaaneqarsinnaasimagami, Thomas J. MIller aviisimut Sentinel Tribunemut oqaluttuarpoq.

Timmisartortartoq Afrikami sakkutooqarfimmut qularnaatsumik ingerlatitippaa.

Kalaalit Nunaanniinnermini Thomas J. MIlleruip timmisartut pingasut katillugit 24-inik issimasullit ajornartorsiortut radioni atorlugu annaassimavai.

Virginia Wolvenip Kalaallit Nunaanniinnini assigiinngitsunik misigissuseqarluni eqqaamavaa. Taanna nammineq sorsunnermi peqataanngilaq, USA-mili illoqarfiit ilaanni oqaluffimmut attuumassuteqarsimavoq. Sakkutuunut inuusuttunut sorsugiartussanut tuppallersaatitut oqaluffiup neqeroorutigisimavaa sakkutuut ilagiit niviarsiartaannik katissimanngitsunik naapinnissinnaasut.

- Naapitama ilagisimavaat angut inuussuttoq oqaluttuartoq qanittukkut sorsugiaqqusaassalluni aallannginnerminilu nuannisalaarniarluni. Ilumut sallutoq! Pingajussaa naapinnitsinni oqarpoq katikkumallunga. Naaggaarpara kimigiisiinnarporli.Ulloq taanna inuulluaqqujartorlugu qimuttuitsut unittarfiannut qanigakku suli katinniarsaraanga. Isumaqatigiippugut allaqatigiittassalluta, ukiullu marluk qaangiuttut Kalaallit Nunaanni inissinneqarfimminit orlovermat sakkutuumut sorsuttumut nulianngorpunga, Virgina Wolven aviisimut Litchfield Country Timesimut oqaluttuarpoq.

81-inik ukiulik Patrici Finder-Stone Thulemi sakkutooqarfimmiissimavoq, tassani sakkutuunik timmisartortartunik napparsimasunik ajoqusersimasunillu passussisarluni.

- Annertuunik misigisaqartarsimavunga puigunngisaannagasssannik, aammattaarli pisoqartarsimavoq puigorusutannik, Patricia Finder-Stone oqarpoq.