Julie julekortikkut juullisiorpoq
Nuuk Rotary Klubip julekorti elektroniskiusoq ajunngitsuliornermut atugassaq saqqummersippaa, tassani Julie Berthelsenip Juullimi erinarsorlugu.
Quppernermi nittartakkami jul.rotary-nuuk.gl julekortimik pisisinnaavutit, tassani Juullimi immikkut immiunneqarnera tusarsinnaallugu - Julie Berthelsenip kalaallisut, qallunaatut tuluttullu atoraa.
- Julekorti ukiuni marlussunni suliarisimavarput. Suliamik tamassuminnga sulineq piumassutsimik akeqanngitsumillu ingerlanneqarmat aatsaat massakkut tuniniarnissaanut piareerpugut, Nuuk Rotary Klubip præsidentia Henrik Leth oqarpoq.
- Julekortip elektroniskiusup julekortit, manna tikillugu ilaatigut Nuummi pisiniarfinni arlalinni tuniniartarsimasavut, taarsissavai. Internettikkut tuniniaanikkut amerlanerusunut periarfissaqalerpoq siunertamut pitsaasumut tapersersuinissamut tamannalu peqatigalugu nunami tamarmi ikinngutit, ilaquttat allaammi niuernermi attaviit nuannaartillugit, Henrik Leth oqarpoq.
Julekorti elektroniskiusoq erinarsuut ilanngulugu 20 koruuneqarpoq, taakkualu pingajorarterutaat Nanu Børn-imut, Meeqqat Inuunerissut/Bedre Børneliv-imut aammalu Nuuk Rotary Klubip ikiuinermut aningaasaateqarfianut nakkartinneqassapput.