PBS aqqutigalugu akiliisalertariaqarpugut
Aningaaqarnermut ataatsimiititaliap akiitsuvut milliardiusut tillinniarnertut taavai.
Juulimiit septembarip naaneranut Qaaquitsup Kommuniani PBS aqqutigalugu akiliisalernissamut isumaqatigiissutit 186-it innuttaasut kommunimit akiligassat akilernissaannut isumaqatigiissutigineqarput, tassaappullu siornamut naleqiqullugu marloriaatingajaat.
Kommunimiit PBS-imut tungnatillugu paasisitsiniaasoqarpoq, taamaaliornikkummi akiliinngitsoornissaq pinngitsoortinneqarsinnaavoq, taamattoqartillugumi komminit pissarsiassaralui annertusiartortarput. Taamaaliornikkut aamma kommuni allaffissornikkut piffissamik aningaasanillu sipaassaaq, akiligassani allattorneqarunnaassapput, allakkap puuinut ikiorarneqarlutik allakkerivikkullu nassiunneqarlutik.
Inatsisartuni aningaasaqarnermut ataatsimiitialiaq Qaasuitsup Kommuniani misilittakkat pitsaasut tunngavigalugit naalakkersuisunut kajumissaaripput PBS-ip atornissaa piumasaqaatinngorteqqullugu, 2011-milu uparnaakkut inatsisissamut siunnersuut ilimasaarutigineqareerpoq.
Milliardinngulerpoq
PBS-ip atugaalernissaanut kajumissaarineq ilungersunartumik tunngaveqarpoq: Nunatsinni innuttaasut pisortanut akiisuui amerliartuinnarput, ullumikkullu katillugit tamatta 954 milion kroninik akiitsuqarpugut. Naatsorsuinerit nutaat takutippaat, innuttaasut 14-init sinnerlugit ukioqartut agguaqatigiissillugu pisortant 6,22-nik akiitsunut suliaqarfiusut katillutik 22.000 kroniusut.
Akiitsut amerlanersaaraat meeqqanut akilersuutit tassaasut 252 million kronit, akileraarutit A-t 193 million kronit, restskatti 143 million kronit, ESU-mut akiitsut 75 million kronit, ineqarnermut akiitsut 59 million kronit.
Ataasingormat ualikkut aningaasaqarnermut ataatsimiititaliap 2011-mut aningaasanik inatsisissap aappassaaneerneqarneranut atatillugu isuliutersuummini inuit akiliisinnaassuseqaraluarlutik akiliiumanngitsut tillinniarnertut taavaa: – Akiitsut ilaat akuerineqarsinnaanngitsumik inuit akiliinissaminnut piumassueqannginerannik peqquteqarpoq.
Aggust 2009-miit septembar 2010-mut akiitsut suliarineqartut 244.203-miit 267.060-nut amerlisimapput, taakkulu aningaasanngorlugit 909 millionimiit 954 million kroninut amerleriarsimallutik.