Sisimiut umiarsualiviata allinissaa sukkanerussaaq
Qeqqata Kommuniata Sisimiuni talittarfik allerusuppaa namminersorlutillu oqartussat aningaasalinissaat utaqqerusunnagu
Qeqqata kommunalbestyrelseata naatsorsuutigaa marlunngornermi aningaasaqarnermut ataatsimiititaliami Sisimiut talittarfiata allinissaanut aningaasaliissutit affaasa akilerneqarnissaanut innersuussinerup akuersissutigineqarnissaa.
- Tamanna pisinnaavoq Qeqqata Kommuniani Sisimiut umiarsualiviata allinissaanut immikkoortut pingasut nutaanik suliarereeraalu, taamaalilluni nunatsinni illoqarfiit annersaasa tulliani pisariaqartitsineq piumasaqaatillu naammassineqarsinnaassallutik, Hermann Berthelsen nalunaarpoq.
Naak namminersorlutik oqartussat umiarsualivimmik piginittuugaluartut namminnerlu alliliinerit akilertariaqaraluarlugit kommuni utaqqisinnaajunnaarpoq. Taamaattumik Qeqqata Kommuniata maannakkut neqeroorutigaa umiarsualiviup allinissaanut aningaasartuutit affaasa akilernissai, tassanilu utaqqineqarani umiarsualivik ilaannakuusumik tamakkiisumilluunniit kommunimut tunniunneqassanersoq.
- Ukiut sisamat matuma siorna Umimmak Traffic A/S-imi ingerlatsinissamut pilersaarutit saqqummiuppavut, tassani Sisimiuni talittarfiup allinissaa pingaartinneqarnerpaajulluni. Kingorna aningaasaliiniartunit saaffigineqartarpugut, namminersorlutilli oqartussat pilersaarutinut suli isumminngilaq, Hermann Berthelsen oqarpoq erseqqisarlugulu:
- Utaqqeqqissinnaajunnaarpugut!
Utaqqeqqissinnaajunnaarnerminni alliliinerup affaa akilissallugu maannangaaq siunnersuutigaat. Kingorna kommunip piginneqataaneranut pappiliarsornerit aaqqinneqarumaarput.
- Taamaaliornissarput aalisarnerup takornariaqarnerullu pisariaqartippaa, taamaalillutik kilisaatit takornariartaatsillu Sisimiunut talissinnaallutik. Nunatsinni inuutissarsiornikkut ineriartornissamut pisariaqarluinnarpoq maannakkut umiarsualiviup allinissaanut siullermut 56,5 million kronit atorneqarnissaat, Hermann Berthelsen oqarpoq.