Qallunaat aqqi ukiuni 20-ni CIA-mi allattugaatigineqartarput
USA-p ajornartorsiutitaqanngitsumik qallunaat innuttaasut aqqi, assingi inuuillu suli allattugaatigisinnaavai, namminersorlutik nakkutiginnittut isumaqarpata pasinartoqartuusut.
USA-p aallartitaqarfiani nakkutiginninnermit PET-p nalunaarusiaani allassimavoq aallartitaqarfimmiit "inuit pillugit paasissutissat aallartitaqarfiup inatsisit naapertorlugit pissarsiarisimasaat" allattugaatigineqarsinnaasut.
Taama allappoq Information.
Tassani pineqarput inuit timimikkut ilisarnaataat, biiliisa normui, aammali paasissutissat inummut tunngasut pisortanit paasineqartussaanngitsut, tamanna "Danmarkimi qullersaasut suleqatigalugit pissarsiaappata".
Tassalu imaappoq amerikamiut politiinit akuerineqarsinnaallutik, Information allappoq. PET-p nalunaarusiaani allassimavoq Københavnip politiivi PET-lu arlalitsigut aallartitaqarfimmut ikiuussimasut inuit pasinartut biilillu pasinartut piginnittuinik paasiniaanermi, tamannalu aamma aallartitaqarfimmi sulisimasup nassuiarpaa.
Nalinginnaasumik inatsisitigut isumannaatsuunissamut isorinnissutaasinnaavoq innuttaasut nalusaminnik allattugaatigineqarnerat, eqqartuussiveqarnerup oqaluttuarisaanerani adjunkt Morten Heiberg oqarpoq, taannalu PET-p nalunaarusiaanik allaqataasimavoq. "Ajornartorsiutaavoq qallunaat innuttaasut arlaannik inatsisit naapertorlugit akerliussutsimik takutitsinerminni allattugaatit arlaannut ilanngunneqarsinnaanerat".
- Tamanna inuit pisinnaatitaaffii pillugit eqqartuussiviup sulineranut akerliuvoq, Morten Heiberg Informationimut oqarpoq. Innuttaasutut ilimagineqarsinnaasariaqarpoq ima pasinartigisumik iliuuseqartoqarsinnaasoq allattugaatinut ilanngunneqarsinnaalluni, Informationimut nassuiaavoq.
Aallartitaqarfimmi nakkutiginnittunit paasissutissat tamarmik USA-mi isumannaallisaanermut allattugaasivimmut SIMAS-imut inissinneqartarput, taama allappoq USA-mi naalakkersuisut allattugaatit pillugit nalunaarusiaani. Paasissutissat tamarmik "ukiut tallimakkaartumik nalilerneqartarput ikkunneqarnerminniillu ukiut 20-t qaangiukkaangata aserorterneqartarlutik isumannaallisaanikkut soqutiginarunnaarsimagaangata".
- Biilip aalajangersimasumi inissinneratigut CIA-p allattugaataanni ukiuni 20-ni allattugaatigineqarsinnaaneq apeqquserneqarsinnaavoq, Morten Heiberg oqarpoq, SIMAS-immi paasissutissat CIA-mik allanillu USA-mi paasiniaasartunik aviffigeqartigisarpai.