Upalungaarsimanissamik sungiusarneq innuttaasut tupassutigaat

Naammattumik paasissutisiisimannginneq peqqutigalugu Ilulissani peqqaannagu siggajoortoqalermat inuit ernumalersimapput.

Ataasinngormat 14. november 2010 nal. 16.50 Ilulissani siumut nalunaarutaariinngitsumik ajunaarnersuaqarneranut sungiusarneqarpoq, upalungaarsimasussat illoqarfiup siggartaatai atorlugit kalerrisaarneqarmata. Sungiusarnermi qitiutinneqarpoq Najaaraq Ittuk Diskolinemeersoq, Ilulissaniit Oqaatsuliarluni aallaqqammiinnarluni ikuallalersimasoq. Ilaasut 34-upput sisamanillu inuttaqarluni.

Sungiusarnermi Ilulissani upalungaarsimasussat tamarmik peqataatinneqarput, taamatuttaaq Aasiaat Radio ilaatigullu Kangilinnguani sakkutooqarfik. Ilaasuusuusaartitassat inuusat 37-t, immami uuliasiornermut atasumik Ilulissanilu SPS-imi sungiusartitsinernut atorneqarsimasut, pissarsiarineqarsimapput. Sungiusarneq piviusuusaartinniavinneqarmat upalungaarsimasussat assigiinngitsut pisortaat ataasiakkaat kisimik kalerrereerneqarsimapput. Upalungaarsimasussat sinneri ajutoorfimmut anngukkamik inissaminnullu pereeramik aatsaat kalerrinneqarput sungiusarnerusoq.

Pilersaarutit malillugit Ilulissani politiit tamarmik, qatserisartut tamarmik Ilulissallu napparsimmavianni sulisut 50-it takkupput. Tassuuna uppernarsarneqarpoq annertuumik ajutoorneqartillugu upalungaarsimasussat sivikitsuinnarmik periarfissinneqarlutik sulinissaminnut piareersimasut. Upalungaarsimasussat katillutik 100-t missaanniittut peqataapput.

Sungiusarnermi siunertarineqarpoq misilinniarneqarmat Disko Line angallatimini aammalu Ilulissani upalungaarsimasussat tamarmik qanoq upalungaarsimatiginersut attaveqatigiinneq, suleqatigiinneq akisussaaffiillu agguataarnerat eqqarsaatigalugit.

Sungiusarneq iluatsilluartutut nalilerneqarpoq suliassat tamarmik naammaginartumik naammassineqarmata. Sungiusarneq naammassimmat upalungaarsimasussaatitaasut pisortaat nalilersuipput, taamattaarlu upalungaarsimasussat immikkoortut iluminni aamma nalilersuillutik. Nalilersuinerni taakkuynani paasineqarpoq attaveqatigiinnermut tunngatillugu suli iluarsisassaqartoq. Sungiusarnerni taamaattuni iluarsisassanik nassaartoqartuartarpoq, tamannalumi aamma siunertaavoq; kukkunerit nassaarinissaat iluarsineqarsinnaasullu iluarsinissaat.

Ilulissani innuttaasut ataasiakkaat immaqa tupatsinneqarput, nalilersuinerullumi ilagaa innuttaasut siunissami pitsaanerusumik kalerrinneqartarnissaat, sungiusarneruppat piviusuuppalluunniit. Upalungaarsimasussaatitaasut ajuusaarutigaat innuttaasut ilaat pisariaqanngitsumik annilaartinneqarsimappata.

Powered by Labrador CMS