Sinersortaat 2011-mi ingerlaannassaaq
Qaqortup Ilulissallu akornanni sinersortaammik "Sarfaq Ittuk"-mik ilaasunik angallassinerup siunissaa nalorninartoqaraluartoq sinersortaat aappaagu ingerlaannassaaq. Taamatut aalajangersaavoq RAL.
- Arctic Umiaq Line kalaallit naalakkersuisuinik 2011-mut amigartooruteqarnissamut qularnaveeqqummik isumaqatigiissuteqarsimavoq. Tassaq 2011-mi sineriak atuarlugu ilaasunik angallassineq ingerlaannassaaq, Royal Arctic Linep paasissutissiinermut pisortaa Jakob Strøm maritimedanmark.dk-mut oqarpoq.
Nunatsinni Assartuinermut kommissionip, aningaasarsiornikkut isigalugu, inassutigisimavaa ilaasunik angallassivik amigartoorutaasartoq matuneqassasoq. Inassuteqaalli nalunaarusiap ilaani allassimavoq, tassa nalunaarusiaq tamarmi aatsaat naammassineqassammat qaammatialuit qaangiuppata.
Aatsaallu Assartuinermut kommissionip nalunaarusiaa tamarmi tunniunneqareerpat angallassiviup qanoq pineqarnissaa aalajangiivigivinneqassaaq, imaluunniit eqqornerusumik nunatsinni naalakkersuisut Arctic Umiaq Line suli amigartooruteqarnissamut qularnaveeqquserusunneraat, qularnaveeqqut maanna atuuttoq 2011-mi naappat.
Arctic Umiaq Line Royal Arctic Linep ataani selskabiuvoq.