Mittarfiliornissaq akerlerineqarpoq

Kommune Kujallermi angallannermut ataatsimiititaliami assartuinermut ataatsimiititaliarsuup nunatta kujataani angallaneq pillugu nalunaarusiaa pillugu ataatsimiipput. Ataatsimiititaliaq isumaqatigiippoq.

- Kujataani Atlantikoq qulaallugu timmisartunut mittarfeqarnissaq pingaartutut isigaarput, taamaattumik akuerisinnaanngilluinnarparput siunissami nunap immikkoortuani Atlantikoq qulaallugu timmisartunik mittoqarsinnaannginnissaa. Taamaattumik nunap immikkoortuani mittarfik 1199 meteriusoq akuerinngilarput tamanna Atlantikoq qulaallugu timmisartut missinnaanerannik akeqassappat, Kommune Kujallermit tusagassiuutitigut nalunaarummi allassimavoq.

Angallannermut ataatsimiititaliap nalilerpaa nunap immikkortuani mittarfik 1199 meteriinnaasoq kujataani tamarmi inuutissarsiornikkut pitsaanngitsumik kinguneqassasoq. Suliniutit annertuut arlaqartut Atlantikoq qulaallugu attaveqarnissamik tunngaveqarput, ullumikkullu angallannikkut annertuumik akimmisaarfissaqareerpoq Kangerlussuaq aqqusaarlugu timmisoqartartillugu ingammik assartugassanik.

Angallannermut ataatsimiititaliaq isumaqarpoq assartuinermut ataatsimiititaliarsuup isumaliutersuutaa naammanngitsoq, arlalitsigullu isornartorsiorlugu.

Angallanermut ataatsimiititaliaq isumaqarpoq annertuumik ernumanartoq nalunaarusiami siunnertuutit kujataani angallannikkut ajornartorsiutinik aaqqissutissanik innersuussinngimmata imaluunniit kujataaniit nunarsuup sinneranut attaveqarnissamut tunngatillugu.

Assartuinermut ataatsimiititaliami aamma isornartorsiorneqarpoq Kommune Kujallermut tusarniaasarsimanerit nalunaarutillu isiginiarneqarsimanngitsut.

Angallannermut ataatsimiititaliamiit kommunalbestyrelse kajumissaarneqarpoq naalakkersuisoq attaveqarfigeqqullugu, nunap immikkoortua innuttaasullu kujataata angallannikkut ajornartorsiutaat eqqartorneqarlutik.

- Kujataanut inuutissarsiortunullu pingaarluinnartuvoq Altantikoq qulaallugu attaveqarnissaq. Akuerisinnaanngilluinnarparput Qaqortumi 1199 meterinnarmik mittarfiliornikkut Atlantikoq qulaallugu attaveqarnerup peerneqarnissaa. 1199 meterimik mittarfik aamma utaqqiissaasumik aaqqiinissamut akuerisinnaanngilarput, angallannermut ataatsimiititaliami siulittaasuugallartoq Kalistat Lund oqarpoq.

Kommunalbestyrelsesimi ilaasortaq Thomas Ezekiassen isumaqataavoq.

- Nunap immikkoortuata iluani avataanullu angalaniarnermi ullumikkut annertuumik ajornartorsiuteqareerpugut. Assartuinermut ataatsimiititaliarsuup innersuussutai malinneqassappata kujataa avinngarussimasunngortinneqassaaq, tamannalu akuersaarsinnaanngilarput. Taamaattumik innuttaasut naalakkersuinermillu suliaqartut ataatsimoorlutik siunissami aaqqiissutaasinnaasut kujataamiunut tamanut iluaqutaasussat eqqartortariaqarpaat, Thomas Ezekiassen oqarpoq.

Niels Tækker takornariaqarnermut pisortaq angallannermullu ataatsimiititaliamiittoq oqarpoq:

- Assartuinermut ataatsimiititaliarsuup nalunaarusiaani nalunaarutigineqartut takornarialerisut akornanni annertuumik tupassutigaarput. Atlantikoq qulaallugu timmisartortoqarsinnaanngippat kujataani takornariaqarneq nungussaaq. Allaat asartuinermut ataatsimiititaliarsuarmiit oqaatigineqarpoq takornariat 50 procentimik ikileriassasut assartuinermut ataatsimiititaliarsuup siunnersuutaata kingunerisaanik bilitsit KBH-ip kujataatalu akornanni 1.000 kronimik qaffappata. Akitsuineq taamaattoq takornariaqarnermut, innuttaasunut inuutissarsiortunullu ajorluinnassaaq.