Alcoa pillugu oqallinneq sukangavoq
Soqutigisaqaqatigiiffiit Nuummilu inuit ataasisakkaat innuttaasut qulaatiinnarlugit isornartorsiuipput, Qeqqata Kommunia oqarpoq.
Aluminiumik suliniutpillugu avatangiisinik oqallinneq, sapaatip akunnerani kingullermi tusagassiorfitsigut ingerlanneqartoq sukangakujuppoq, Qeqqata Kommuniata borgmesteriata tullia Karl Lyberth borgmesterilu Hermann Berthelsen isumaqarput.
- Islandip kangiani illoqarfittut ikinnguterput Fjardabyggd qanimut suleqatigaarput, taannalu 2007-imiilli Alcoap aluminiumik aatsitsiviata angerlarsimaffigisimavaa. Fjadabyggd Kommunemi ikinngutivut oqaluttuarput sanaartornermi ingerlatsinermilu misilittakkatik tamakkiisumik naammagisimaaritilik. Avatangiisinullu ajornartorsiutit nunatsinni ulluni makkunani oqaluuserineqartut misigisaqarfigisimanngilaat, Hermann Berthelsen tusagassiorfinnut nalunaarutikkut oqaluttuarpoq.
Karl Lyberthip maluginiarpaa Islandimi suliniummut akerliuneq aamma illofiit pingaarnersaannit Reykjavikimit aallaaveqarsimasoq.
- Taamatupajaaaq nunatsinni pisoqarpoq, tassa nunami illoqarfiit pingaarnersaanni soqutigisaqaqatigiit inuillu ataasiakkaat Maniitsormiut qulaatiinnarlugit oqaluttuulluta aluminiumik tunisassiornissaq uagutsinnut qanoq ajortigissanersoq, Karl Lyberth oqarpoq.
Taamaattumik Qeqqata Kommuniani aatsitassanut atortorissaatinullu ataatsimiititaliami siulittaasutut Karl Lyberthip kajumissaarutigaa Avataq avatangiisinillu soqutigisallit allat Maniitsuliassasut aluminiumillu suliniut pillugu tamanut ammasumik oqallinnermi peqataallutik.
- Nammineq inuttut qilanaareqaara tusassallugu aluminiumik suliniummut illoqarfimmi akerliusut sisamanngorpat Maniitsumi innuttaasunik ataatsimiititsinerm sunik oqaluttuassaqassanersut. Piviusorsiortumik oqallinniartoqannguatsiarpoq, Karl Lyberth oqarpoq.
Borgmester Hermann Berthelsenip aamma Alcoamut pasilliinerujussuit ilisarisinnaanngilai.
- Aloamik oqaloqatiginnittarnitsinni avatangiisinik illersuinissaq eqqarsaatigalugu tunniusimarpasipput ilisimasaqarpasillutillu. Imaanngilaq avatangiisinut akisussaaffik Alcoamut tunniutissagipput.
Naaggali, soorunami Kalaallit Nunaata iluani aluminiumut suliniummut Alcoamullu piumasaqaateqassaagut, pitsaanerussaaq islandimiut norskillu oqaluttussaasui, tamatumani misilittagallit, suleqatigalugit. Alcoamilli oqaloqatigiinneq pitsaasoq ingerlatiinnassavarput Alcoamillu suleqateqarneq kipitinnagu Avatap kajumissaarutaatut, Hermann Berthelsen aamma Karl Lyberth oqarput.