Alcoa Maniitsumi akerlerineqarpoq

Aluminiumik ingerlatsiviup nunarsuarmi tamarmi ingerlatai Greenland Developmentillu paasisitsiniaanera ernumanartoqartitsipput.

Aluminiumik aatsitsiviup titartarneqarnera. Titartagaq: Alcoa

Maniitsormiut ilaat peqatigiiffimmik pilersitsiniarput Maniitsup qeqertaani aluminiumik aatsitsivimmik sananissamut akerliusumik.

- Pingaartumik Alcoap nunarsuarmi tamarmi suliaanik paasissutissiissutit kiisalu Greenland Developmentip paasisitsiniaanera ernumanartoqartitsipput, suliniaqatigiiffimmik pilersitsisoq Bjarne Lyberth tusagassiorfinnut nalunaarummi allappoq.

Pingaartumik suliniaqatigiit pasinapiluttoqartippaat Greenland Developmentip NIRAS-illu aningaasatigut pissarsiassanik naatsorsuinerini naatsorsuutigineqarmat suliffinnik1100-1200-nik pilersitsisoqassasoq. Akerlianik Alcoap quppernerani nittartakkami allassimavoq Islandimi aatsitsivimmi taamaattumi - Alcoa Fjardaal-imi - aatsitsivimmi 450-inik avataanilu 300-nik sulisoqartoq - tassa suliffiit katillugit 750-t.

- Tamanna ilumoorpat inuiaqatigiinnut ilaatigut akileraarutitigut aningaasatigut pissarsiassanik naatsorsuinerit, naatsorsuutigineqartutut suliffinnik 450-nik tunngavilinnik, kisitsisivinnit annertunerupput. Taamaattoqarporlu Greenland Developmentip oqarnera ilutigalugu tassa misissuinerit tamarmik tunngaveqartut "worst case scenario"-mik, Bjarne Lyberth erseqqissaavoq.

Tamanna peqatigalugu tupaallaatigaa paasisitsiniaanermi arlaleriarluni Greenland Developmentmit Alcoamillu oqaatigineqartarmat suliniummut atatillugu imermik errortuutikumik maangaannaq aniatitsisoqassanngitsoq.

- Nassuiarneqarsimanngilarli aatsitsinermut atatillugu imeq nillorsaatitut kiisalu putsumit gasimik saliisoqartassappat tamatumunnga atorneqartoq sumut aniatinneqartassanersoq, Bjarne Lyberth allappoq.

Erngup nukinganik nukissiorfiliortoqassappat tamatumunnga atatillugu imeq Tasersiameersoq Kangerlussuatsiamut aniatinneqartassaaq, taamaasillunilu imeq tarajoqanngitsoq silteqarluartoq Kangerlussuatsiamut aniatinneqassaaq. Tamanna kangerluup uumassuteqarneranut qanoq kinguneqaateqassanersoq nassuiarneqarsimanngilaq.

Paasissutissiinermut tunngavik taama amigaateqartigisoq tunngavigalugu taama annertutigisunik kinguneqartussamik kalaallit innuttaasut politikerillu inuit qinigaasa aalajangiisinnaanersut pillugu oqallinnissaq suliniaqatigiit ujartorpaat.

Taamaattumik suliniaqatigiit novembarip 25-ianni 2010 nal. 1 Maniitsumi ATI-mi oqallitsitsiniarput.

Powered by Labrador CMS