Sarfaq Ittuk unnuaq ikkarlippoq

Ataasinngormat unnukkut Maniitsoq qimariitsiarlugu Sarfaq Ittuk Napasup avannannguani ikkarlippoq.

Unnuaq ikkarlunnermiit. Assi: Ilja Leo Lang

Ataasinngormat unnukkut Sarfaq Ittuk kingusinaalaarluni Maniitsumiit aallarmat, suut tamarmik pissusissamisut ingerlapput. Tamannali allanngortussaavoq.

Ilja Leo Lang, cand.scient.pol Ilisimatusarfimmilu ilinniartitsisoq ilaasunut ilaavoq. Mailimi ima oqaluttuarpoq:

- Unnuap qeqqata missaani ilaasut nipimik nuanniitsumik itertinneqarput. Umiarsuaq ikkarlippoq. Ikkarlunnerup akisuanera umiarsuarmi tamarmi pisorpaluppoq.Kingorna suut tamarmik nipaarupput.

Siniffinnit pissillunga atisakka tigoorarpakka kalerrisaarinermi nipit naatsut arfineq marluk naggataagullu takisooq tusarnaaqqissaarniarsaralugu, ilami ajunaalernermi kalerrisaarisoqarnissaanik ilimasukkaluarpunga. Susoqanngilarli. Taava højtalerikkut oqaluttoqalerpoq. Kiisami! Ajoraluartumik kalaallisuinnaq kalerriisoqarpoq.

Nalunaarutigineqareernerata kingorna susoqanngilaq. Qallunaatut nassuiaasoqanngilaq - tamanna umiarsuarmi ileqquugaluarpoq. Tamannali ima nalilerpara pisoq pingaartorsuusimanngimmat kalaallisuinnaq oqaatigineqartariaqarluni. Aalajangerpunga atisalersorniarnanga innaqqillungalu.

Taama pisoqareersoq eqqisseqqinnissaq ajornakusoorpoq. Igalaakkut itsuarpunga. Imaq samma samma. Taava silami ikumasoq takulerpara. Tassaavoq nunaqarfimmukartaat Angaju Ittuk sanitsinnut pisoq kingornalu saneqqulluta ingerlaqqittoq.

Angallat tupigusullunga isiginnaartillugu nalunaaruteqartoqaqqippoq. Siullermik kalaallisut kingornalu qallunaatut. Qallunaatut ilaasut eqqissisisarneqarput imermik isaasoqanngitsoq. Imermik isaasoqanngilaq. Taavami pisoq immikkorluinnaq ippoq!

Makiteqqippunga atisalersorlungalu, atisammi nassatakka tamaasa atillugit silamukarpunga. Silamiilluni susoqarnersoq malinnaavisiuminarneruvoq.

Ikkarlummi kaanngarnaveeqqavugut. Talerpiup tungaani meterinik sisamanik ungasitsigisumi qaarsorujussuaqarpoq. Umiarsuaq qaarsup tungaanut uertarpoq. Umiarsuup naalagaata kaanngartinniarsaraatigut. Iluatsinngilaali.

Ineeqqannut ammukaqqikkama pingajussaa nalunaartoqaqqippoq - mannakkut kalaallisut qallunaatullu. Paasitinneqarpugut umiarsuaq ueqqinnavianngitsoq, ulinnissaali utaqqisariaqassagipput. Akunnerup affaata missaani umiarsuaq talerpiup tungaanut ueqqippoq, maannakkulli kingaatsumik patajaatsumilli kaanngariartorluni.

Højtalerikkut oqarfigineqarpugut kaanngarsimasugut Nuummulli ingerlaalerluta, tassanilu kikkut tamarmik tarnip pissusaanik ikiorneqarnissaminnik neqeroorfigineqassapput. Neqeroorut pitsak, aallarlualaaqqaarallartali.

Nalunaaqutaq 3.35 ikkarlummit kaanngarpugut Nuummullu aallarluta, ullullu qeqqata missaani tikissalluta. Nuummi ullaap tungaani suliassakka taamaatiinnerpakka pisarnermiillu qilanaarnerullunga nunatsinni illoqarfiit pingaarnersaata takoqqinnissaa qilanaaraara, Ilja Leo Lang allappoq.

Powered by Labrador CMS