Betalingsservicemik paasisitsiniaaneq iluatsilluarpoq
Qaasuitsup Kommuniani sullissinermik sulisut innuttaasut amerlanerusut Betalingsservice-mik atuilernissaannik paasisitsiniaanerat angusaqarfiulluarsimavoq.
Piffissami juulimiit septembari ilanngullugu PBS-imut nutaanik 186-inik isumaqatigiissuteqartoqarsimavoq. Siorna piffissami tassani paasisitsiniaanermit marloriaatingajaapput, taamatut allappoq qaasuitsup.gl.
Betina Hansen Kristiansenip, innuttaasunik sullissinermi pisortap, suliniut nuannaarutigaa.
- Innuttaasut Betalingsservicemik atuinissaannik ikioraangatsigit innuttaasut aaqqiissummik pitsaasumik pisarput, sulisullu suliassanut allanut piffissaqarnerulertarput, Betina Hansen Kristiansen oqarpoq.
Qaasuitsup Kommunianut suli pingaaruteqarpoq innuttaasut suli amerlanerusut Betalingsservicemik atuilersinnissaat, tassa tamatumuunakkut ulorianartorsiornikinnerussammat akiligassat akilernissaasa puigornissaat. Tamanna peqatigalugu kommunip allaffissornermut piffissarujussuaq sipaassavaa, tssa akiligassat allattortarunnaassammagit allakkullu puuinut poorlugit nassiuttarunnaarlugit.
Paasisitsiniaaneq naammassereeraluartoq Qaasuitsup Kommuniani innuttaasut suli periarfissaqarput betalingsservicemik atuinissamut nalunaarnissaminnut.