Ilinniartoq ipeqqasoq nassaarineqarpoq

Pingasunngormat ullaap tungaani qulit qeqqanut Qaqortumi politiit nalunaarfigineqarput Tasersuarmi inuup timaanik toqungasumik takusoqarsimannguatsiartoq.

- Pingasunngormat ullaap tungaani Qaqortumi Tasersuup eqqaani blokkimi najugalik qinngusersorluni tupinnarsorisaminik takusaqarpoq. Tatsimut ammukarpoq sinaanillu takusinnaavaa inuup niaquatut isikkulik. Politiit kalerrippai, politiillu qatserisartunik ilalerlutik gummibådimik takuniaapput tatsip sinaanit 25 meterinik avasissusiimmut. Politiit takuvaat taanna tassaasoq ujaarineqartoq Hans Peter Svendsen, Kujataata politeeqarfiani pisortaq Bent Ole Kleist oqarpoq.

21-inik ukiulik Hans Peter Svendsen Upernaviup pigisaani nunaqarfimmeersuuvoq Qaqortumilu Niuernermik Ilinniarfimmi atuarluni, arfininngormat unnukkut illoqarfimmiilluni periarfeerukkami. Kingullermik takuneqarpoq sapaatikkut ullaassakkut kollegiap najugaqarfiata eqqaani, politiillu annertunerusumik ujaasilerput, Tasersuaq ilanngullugu ujarlerfigalugu.

- Tasersuarmi ujaasigatta nassaarinngilarput. Aamma qinngutit immikkut ittut atoraluarlugit aqqartartumillu tatsimi ujaasisitsigaluarluta. Taamaattumik ilimagaarput ullut marluk matuma siornatigut anorersuarnera tatsimi sakkortuumik sarfaqalersitsisimasoq, immaqalu tamanna pissutigalugu tatsip naqqanit kaanngarsimasoq, immaqa kiggugussaasimalluni, Bent Ole Kleist oqarpoq.

Politiit sapaatip akunnera ataaseq annertuumik ujaasereerlutik Hans Peter Svendsenimik ujaasinertik unitsippaat.

Politiit qularnaarlugu oqaatigisinnaanngilaat qanoq pisoqarsimanersoq, timaatali misissorneqarneratigut paasineqarpoq pinerluttoqarsimanngitsoq.

Ujaarineqartup nassaarineqarneranik ilaqutaasut nalunaarfigineqarput.