Helikopterit siggeriaannanngorput
Sakkutuut helikopteriisa arfineq-pingasut affaat aqumimmi aquutimikkut siggissimapput, pingasullu timmeqqusaanngillat.
Sakkutuut imarsiortut helikopteriisa Lynx-it arfineq-pingasut ilaat sisamat, nunatta Savalimmiullu eqqaanni umiarsuarni alapernaarsuutini helikopteritut annaassiniutitut atortut aammalu Somalia-mi imaani ujajaaniartartunik malersuinermi atorneqartartut, aquminni aquutimikkut qupparsimapput. Helikopterit pingasut timmisinnaanngillat, sisamaallu akuttunngitsumik misissorneqartarpoq.
Taamatut allappoq jp.dk.
Sakkutuut imarsiortut Helikoptertjeneste-anni pisortap, orlogskaptajn Martin Thorupip oqaatigaa sigginnerit siulliit qanittukkut paasineqartut, kingornalu misissuinerni helikopterit allat pingasut sigginneqartut paasineqarsimasoq. Sigginnerilli piffissami kingullermi ajornartorsiutaasarsimasut ilagiinnarpaat, tamakkua pissutigalugit helikopterit akulikippallaamik nunamiiginnartariaqartarlutik.
- Sukkanerpaamik aqui misissortillugillu iluarsaatsissavagut, naatsorsuutigigallarparpullu tamanna pisinnaasoq qaammatut marluk-pingasut ingerlaneranni. Taavalu helikopterit sinnerisa sigginneqalinnginnissaat sianigissavarput, taanna oqarpoq.