Kalaallit Nunaanni uuliamik nassarneq allanngortitserujussuassaaq
Kalaallit Nunaanni pisuussutit ukiut arlaqanngitsut ingerlaneranni inuiaqatigiinnik allanngortitserujussuassapput.
Nunarsuarmi tamarmiit aatsitassarsiorfiit uulisiorfiillu Kalaallit Nunaanni aatsitassatigut uuliamillu pisuussutit qanoq annertutiginersut paasinialeruttorpaat, ukiualuillu qaangiuppataa kalaallit inuiaqatigiit suliffissuaqarfinngussapput.
Tamanna ilisimatuut namminersorlutillu oqartussat nammineq takorloorpaat.
Namminersorlutik Oqartussaniit teknikerit aningaasaqarnermillu ilinniarsimasut assartuinermi ataatsimiititaliarsuarmi titartaleruttorpaat ukiut 25-it qaangiuppata Kalaallit Nunaat qanoq isikkoqarsinnaanersoq, talittarfeqarluni mittarfeqarlunilu nutaanik taamaalillunilu suliffissuaqarnikkut ineriartorneq suleqataaffigalugu.
Taama allappoq atuagassiaq Ingeniøren.
- Kalaallit Nunaata suliffissuaqarfinngornissaa ilaatigut pissaaq suliat angisuut aqqutigalugit aatsisassarsiornermut aluminiuliornermullu tunngasut, assarsuinermut ataatsimiititaliarsuup siulittaasua, inuiaqatigiit aningaasaqarnerannik ilinniarsimasoq Syddansk Universitetimilu Suliffinnik aqutsinermut aningaasaqarnermullu ingerlatsivimmi ilisimatooq Christen Sørensen Ingeniørenip nittartagaanut ing.dk-mut.
Ilimagineqarpoq nunaqarfiit matuneqassasut illoqarfiillu nutaat pilersinneqarlutik, Christen Sørensenillu oqaaseq 'qitiusumut katersortitsineq' nangaassuteqarani atorpaa:
- Najugaqariaaseq qitisusumiinnerussaq. Nunaqarfinni innuttaasut ikiliartorput. Tamannali ingerlalluarnerpasarpoq naalakkersuinermik suliaqartut ikiuukkaangata. Paasivara ilaqutariit meerartallit aallarnissaannut inuiaqatigiit tapiisartut, Christen Sørensen Ingeniørenimut oqarpoq.