Inuit pisinnaatitaaffii pillugit tusarniaaneq soqutigineqarluartoq
Inuit pisinnaatitaaffii pillugit Kalaallit Nunaanni siullermeerluni tusarniaanermi Katuami Ineeraq ulikkaarluinnarpoq.
Kalaallit Nunaata iluani aammalu Danmark-imut attaveqarnermi inuit pisinnaatitaaffii pillugit unammminartut naliliiffiginissaanni Katuami Ineeqqami najuuttut tamarmik tusarnaarput, Danmark-imi nunanut allanut ministereqarfik suleqatigalugu Kalaallit Nunaanni inuit pisinnaatitaaffii pillugit tusarniaaneq siulleq naalakkersuisut ingerlammassuk.
Ataatsimiinnermik aqutsisut apeqquteqarfigineqarsinnaanngillat, tassaasut Marianne Lykke Thomsen naalakkersuisuneersoq, Julie Winding nunanut allanut ministereqarfimmeersoq aamma ambassadøri Arnold De Fine Skibsted, inuit pisinnaatitaaffii pillugit ambassadøriusoq, taamaallaalli erseqqissaassutigisinnaallugit pissutsit ilaat Kalaallit Nunaanni inuit pisinnaatitaaffii pillugit nioqqutitsinerusutut isumaqarfigisatik. Oqallisissallu assigiinngitsut 20-t najuuttunit saqqummiunneqarput.
Kattuffinnit soqutigisaqaqatigiinneersut arlallit ornigussimapput, ilaatigut Nuummi piniartut aalisartullu kattuffiannit NAPP-mit pisut, taakkulu erseqqissaatigiumavaat inuussutissarsiutertik naalakkersuisut unitsinniaraat, aalisartut piniartullu paasissutisseqqaarnagit apereqqaarnagillu.
Inatsisilerineq malillugu ataataqangitsut kattuffianneersup Tida Ravn-ip inatsit ujartorpaa ataataqarnissaminnik pisinnaatitaaffiliisoq, inuillu pisinnaatitaaffii pillugit ingerlatsivimmik Kalaallit Nunaanni pilersitsisoqarnissaa ujartorlugu, taamaalilluni Kalaallit Nunaanni najugallit kalaallillu ataasiinnarmik oqaasillit saaffiginniffissaqarsinnaaqqullugit, tamakkuninnga atorfissaqartitsinerminni. Kalaallillu Danmark-imi aamma Kalaallit Nunaanni najugallit ataasiinnarmik oqaasillit namminneq oqaatsitik atorlugit kiffartuunneqarsinnaannginnerat aamma erseqqissaatigaa, isortanut oqartussanut saaffiginninnerminni.
Tarnimikkut nappaatillit pinerluuteqarsimasut misissorneqarnermik nalaani pineqaatissinneqartunut inissiisarfinnut inissinneqartartut eqqartuussivinni illersuisusartut aqutsisunut paasissutissiissutigaat, eqqartuunneqarnissamillu tungaanut ukiut marluk tikillugit inissinneqarsimasartut. Pinerluuteqarsimasut sakkortuumik pineqaatissinneqarsimasut tarnimikkullu nappaatillit pinerluuteqeqarsimasut suli Danmark-imut aallartinneqartartut kriminolog Evy frandsen-ip paasissutissiissutigaa.
Universal Periodic Rewiew-mik (UPR) taaneqartartumi Danmark-ip, Kalaallit Nunaata aamma Savalimmiut FN-ip Inuit Pisinnaatitaaffii pillugit Isumasioqatigiiffiani 2. maj 2011-mi siullermeerlutik tusaarniaavigineqarnissaat pissutigalugu inuit isumaannik tusarniaaneq pivoq, Inuit pisinnaatitaaffii pillugit Isumasioqatigiiffimmut ilaasumi, tamannalu pissutigalugu nunat FN-imut ilaasortat tamarmik ukiut sisamat ingerlanerini namminneq nunamik iluanni inuit pisinnaatitaaffii pillugit pissutsinik paasiniaaffigineqarlutik naliliiffigineqartarput. Inuit pisinnaatitaaffii pillugit pisussaaffiit innauttasunut iluaqutaasut nunanit malinneqarnersut naliliiniarnermi anguniarneqartarpoq.
Taamatut naliliiniarnermut piareersaatitut qallunaat naalakkersuisui Kalaallit Nunaanni aamma Savalimmiuni naalakkersuisut peqatgalugit nalunaarusiamik 20-nik quppernilimmik suliaqassapput, Danmark-imi, Kalaallit Nunaanni Savalimmiunilu inuit pisinnaatitaaffii pillugit atukkat pillugit, taakkulu FN-ip naliliiniarnerani saqqummiunneqassapput.
Nalunaarusiami Kalaallit Nunaat quppernerit sisamat atorlugit eqqartorneqassaaq, tassanilu Namminersornerup atulersinneqarnera allaaserineqassaaq, sulinerup imaqarnersiorneqarnera ilanngullugu, quppernerillu sinneri atorneqassallutik tusarniaanermi saqqummiunneqarsimasunik.