Nunaqarfiit minnerit suli minnerulissapput
Nunaqarfinni najugallit 1990-imiit 2009-mut 25 procentimik ikileriarsimapput.
Ukiuni kingullerni 20-ni nunaqarfinni najugallit sisamararterutaat allanut nuussimapput, nutsernerlu 2005-imiit 2009-mut annertunerulersimalluni.
Nalunaarusiami »Kalaallit Nunaanni najugaqarfiit nunaqarfiit maluginiarnerullugit'-mi tamanna uppernarsarneqarpoq, Nordregio-mit suliarineqarsimasumi, ilisimatusarfittut suliffimmi 1997-imi Nordisk Ministerråd-imit pilersinneqarsimasumit.
Nunaqarfinni pissusiviusut nalunaarusiami ersersinneqartut naalakkersuisut siulittaasuat Kuupik Kleist, Inuit Ataqatigiit, sermitsiaq.ag-mut taama oqarpoq, imaanngitsorli nunaqarfinni ulluinnarni atukkat pillugit politikerit isumaannut naleqquttumik. Taamaattumik nalunaarusiaq amerlasoorpassuarnik paasissutissartaqarnermigut siunissami nunaqarfinnut politikeqarnissap ilusilersornissaani atortussaassaaq pingaarutilik.
Ukiuni kingullerni qulikkaani Kalaallit Nunaanni sumut nunassittarnermi illoqarfinnut nunaqarfinnullu annernut katersuuttarneq erseqqissumik malunnaateqarsimasoq nalunaarusiami paasineqarpoq.
Pingaartumik ukiuni kingullerni 20-ni nunaqarfiit mikisut 50-it inorlugit inullit atugaat artornarsimapput. Nunaqarfinni minnerni najugallit 936-niit 346-nut ikileriarsimapput, aammalu 2005-imiit 2009-mut Igalikumi, Qassimiuni, Qeqertami, Saarlumi, Ammassivimmi aamma Kangerlummi najugallit 13 procentimik ikileriarsimapput.
Nunaqarfinnik matusinissaq Kuupik Kleist-ip oqaatsitut nammineq atorumanngilaa, kisiannili naalakkersuisut nunap immikkoortuini ineriartoritsinissamut periaasianni, RUS-imik aamma taaneqartumi, illoqarfiit nunaqarfiilluunniit ataasiakkat isiginiarneqanngillat, nunalli immikkoortuini inuussutissarsiornermut periarfissat tamakkiisut isiginiarneqarlutik.
- Illoqarfinnit nunaqarfinniillu ataasiakkaanit nunap immikkoortuiniittunit suliffissaqarfinnut ineriartorfissanullu nutsertoqarnissaa siulittuutigaarput, Kuupik Kleist oqarpoq, tamattami Nuummi najugaqarsinnaanngilagut, pisuussutit uumassusillit atorluarniarnissaat kalaallit tunngavissarimmassuk.
Maannatut sukkatigisumik nunaqarfinni najugallit ikiliartussappata, ukiuni tulliuttuni 10-20-ni nunaqarfiit arlalissuit inuerutissapput, Kalaallit Nunaanni najugaqarfiit pillugit nalunaarusiami erseqqissaatigineqarpoq.