Ikummatissamut akitsuut 10 ørenut appartinneqarpoq
Naalakkersuisut tatineqarnermikkut nakkaannarput.
Minutsini akunnernilu makkunani Naalakkersuisut katersuupput, aappaagumut aningaasanut inatsisissami amigartoorutissat matussuserniarlugit, ilaatigut ikummatissanut akitsuutip isorineqaqisup 25 øremiit 10 øremut appartinneqarneranik pilersinneqartussaq.
– Annertuumik tatineqarsimavugut aamma suleqatigisatsinnit, ikummatissanut akitsuutip aalisartunut, piniartunut, ilaqutariinnut inuutissarsiornermullu sunnniutissaa annikilleseqqullugu, naalakkersuisut siulittaaasuat Kuupik Kleist Inuit Ataqatigiinneersoq Sermitsiaq.AG-mut oqarpoq.
Ikummatissanut akitsuutip literimut 25 øremik ilaneratigut 50 million kronit nunatta karsianut isertinneqartussaapput, 10 øremilli qaffaaneq 20 million kroninik isertisissutaassalluni.
Sermitsiaq.AG-mi paasisavut naapertorlugit naalakkersuisut ikummatissanut akitsuummit isertitassaagaluit 30 million kronit saniatigut aamma allatigut sipaarutissanik 20 million kroninik nassaarniartussaapput.
Taamaalillutik pingasunngornermut ualikkut sipaarniutissat nassaariniarneqartussat 50 million kroniupput.
– Aningaasanut inatsisissap oqimaaqatigiinnissaa aalajangiussimavarput, nunattami karsiani aningaasanik tigoriaannarnik uninngasuuteqanngilagut, Kuupik Kleist Sermitsiaq.AG-mut oqarpoq.