Puisi-mi pisortaasimasoq ornigulluni nassuiaassaaq
H. P. Barlach Christensen timmisartumik Nuummukassaaq Puisi A/S-ip akiliisinnaajunnaarnera pillugu eqqartuussinermi nassuiaajartorluni.
Puisinik tunisassiornermik ingerlatsiviup Puisi A/S-ip akiliisinnaajunnaarnerata eqqartuussivikkoortinneqarnerani unnerluutigineqartut qitiunerpaasa ilaat, pisortaasimasoq Hans-Peder Barlach Christensen videokut ataatsimiinnikkut nassuiaassanngilaq, nammineerrtlunili ornigutissalluni Nuummi Landsretimi nassuiaajartorluni.
Taamatut aalajangiivoq arfininngormat eqqartuussinerup ulluata aappaani landsdommer Søren Søndergård Hansen.
Hans-Peder Barlach Christensen, suliassami eqqartuunneqartut 12-it ilaat, videokut ataatsimiinnikkut nassuiaateqarusussimavoq, Aasianni najugaqarami.
Kissaat tamanna unnerluutiginnittup eqqartuussissuserisuata Jesper Müllerip, Nuummi Nuna Advokater-neersup, akerlilerpaa. Taassuma innersuussutigaa pisariaqartoq unnerluutigineqartup inimiinnissaa, pappiaqqat saqqummiunneqartut pisortaasimasup isummerfilerunigit.
Unnerluutiginnittup tunngavilersuutai landsdommerip malippai. Pisortallu eqqartuussissuserisuata Phillip Comerfordip, Frederiksberg, eqqartuussisup aalajangernera Københavnimi Østre Landsretimut ingerlateqqikkaluaraa qularnanngilaq Hans-Peder Barlach Christensen pilersaarutit malillugit pingasunngorpat Nuummi Landsretimut ornigutissasoq.
Tamatumunnga pissutaavoq ingerlatitseqqiineq kinguartitsissutaassanngimmat. Tassa imaappoq, landsdommerip aalajangiinera atuuppoq, Østre Landsretip allammik aalajangiinissaata tungaanut.
Nassuiaasussarpassuit
Pisortaasimasoq pisimasumi killisiorneqartussat 25-it siullersaraat. Nassuiaasussat allat ilaatigut tassaapput siulersuisuni siulittaasuusimasoq Lars-Emil Johansen, aningaasaqarnermut naalakkersuisuusimasoq Josef Motzfeldt, kiisalu selskabimi siulersuisunut ilaasortaasimasut.
Ingerlatsiviup 2000-imi akiliisinnaajunnaarnerata kingorna Puisimut tunngasuni unnerluutiginninnerit marluupput, taakkunani marlunni namminersorlutik oqartussat unnerluussisuullutik. Qullersaasimasut, siulersuisut, kukkunersiuisoq kiisalu Puisip kukkunersiuinermut selskabia katillugit 22,5 millioner koruuninik akiliisinniarneqarput. Unnerluutigineqarpullu pissutigalugu - namminersorlutik oqartussat malillugit - iliuuseqarnermikkut aningaasat annaaneqarnerannut akisussaammata.
Eqqartuussinermi ullup aappassaani namminersorlutik oqartussat unnerluutigineqartullu eqqartuussissuserisuisa suliassaq annertooq aallartippaat, pisimasumi uppernarsaatissat qitiunerpaat saqqummiullugit, katillugit quppernerit 1.685-it.
Assersuutigalugu tassaapput siulersuisut ataatsimiinnerannit ataatsimeersuarnernillu imaqarniliornerit, aningaasat nuunneqarsimanerannut uppernarsaatit, aningaaserivinnut saaffiginnissutit il.il.
Suliaq tamanna marlunngorneq ilanngullugu ingerlanneqassaaq tamatumalu kingorna killisiuinerit aallartissapput. Ataasinngorpat eqqartuussineq nangissaaq.