Puisimi eqqartuussissuserisut paasissutissanik ujaasipput

Unnerlluutigineqartut eqqartuussissuserisui arlaqartut oqarput Nunatta Eqqartuussiviani Puisimut tunngatillugu suliami nammineerlutik paasissutissanik pingaarutilinnik ujaasisariaqarsimallutik.

Suliap naammassiartulernerani siulersuisunut ilaasortaasimasup Jess G. Berthelsenip illersuisuata Jens Christensenip Købehnavini eqqartuussissuserisunit Koch/Christenseneersut ajornartorsiut tamanna oqaatigaa.

– Atortussat tigulaariffigineqarsimapput unnerluussisunut pitsaanerusinnaasut toqqarsineqarsimallutik, eqqartuussissuserisoq oqarpoq, tassanilu eqqarsaatigai suliffeqarfiup akiliisinnaajunnaartup piginnittuisa namminersornerullutillu oqartussat eqqartuussissuserisui Nuna Advokaterit suliamut atatillugit pappiliaataat taarseeqqusilluni suliamut tunngatillugu saqqummiunneqartut.

Jens Christiansenip oqaatigaa suliami pappilissat atorneqartut, tassalu naalakkersuisunut ilaasortat Puisi A/S-imilu siulersuisut 25. januar 2000 ataatsimiinnerannit imaqarniliaq nammineerluni nassaariniartariaqarsimallugu.

Tassannga erserpoq naalakkersuisut siulittaasuata Jonathan Motzfeldtip Siumumeersup Puisip siulersuisui nersualaarai suliaq siusinnerusukkut unitsissimanngimmassuk naak aningaasatigut ajornartorsiortoqaraluartoq.

– Suliniut namminersornerullutik oqartussanit taperserneqarpoq kujataani suliffissaaleqinermik akiuiniarluni suliammat, aammali suliassaq upperineqarpoq. Aatsaat siullermeertumik namminersornerullutik oqartussat suliniuteqalinngillat ajalusoortunik. Aalisarnermut suliniutinut aamma annertuumik aningaasaliisoqartarsimavoq annaasaqarfiusunik, maannamullu aatsitassarsiornernut suliniutinut 300 million koruunit atorneqarsimapput sulili aallartitsisoqarani, Jonathan Motzfeldt oqarsimaneragaavoq

Unnerluutigineqartut eqqartuussissuserisuisa imaqarniliaq taannarpiaq saqqummiuppaat erseqqissarniarlugu isornartorsiuinissamut pissutissaqanngitsoq suliap siusinnerusukkut unitsinneqarsimannginneranut atatillugu.

Suliffiummi qangarpiaq unitsinneqarsimanera eqqartuussissulersuunnermut peqqutaavoq.

Eqqartuussivilersuussisut piginnittut isumaqarput suliffeqarfik kingusinnerpaamik oktobarip 1-ani 1999-mi upernaakkut 2000-mi pinnani.

Powered by Labrador CMS