Puisimi unnerluutigineqartut akisussaaffitsit malinngilaa
Unnerluutiginnittut eqqartuussisuserisuata Jesper Müllerip, Nuna Advokater, eqqartuussivimmi saqqummiussinermini erseqqissaatigaa Puisi A/S-imi pisortaq, siulersuisuni ilaasortat aamma kukkunersiuisut akiliisinnaajunnaarneq sioqqullugu akisussaaffitsit sumiginnarsimagaat.
Taarsiiffgineqarnissaq pillugu suliami annertuumi Nunatta Eqqartuussiviani ingerlanneqartumi Jersper Müllerip marlunngormat pingaarnerutillugu sammivaa pisortamut, siulersuisuni ilaasortanut arlalinnut aammattaaq kukkunersiuinermut aamma kukkunersiuisumut, unnerluussutit marluusut aappaat.
Namminersorlutik Oqartussat suliap aappani inuit 11,6 millionit koruuninik piumasaqaateqarfigalugit unnerluutigaat. Kisitsimmi matussuserneqarniarput ingerlatsinermut qularnaveeqqutit 12 millionit koruunit, Inatsisartunit 1999-imi novembarimi aningaasaliissutigineqartut, akiliisinnaajunnaarneq 2000-mi aasami pisoq sioqqutilaarlugu. Namminersorlutik Oqartussat tamatumunnga tunngatillugu tunngavilersuutigaat, Puisip aningaasanik 12 millionit koruuninik amerlanerujussuarnik pisariaqartitsinera nipangiutiinnarsimasimagaa, taamaattumillu eqqutsinik tunngaveqarluni qularnaveqquusiisoqarsimasoq.
Tamatumunnga tunngatillugu Jesper Müllerip ilaatigut innersuussutigaa, unnerluutigineqartut ilisimamasimammagaat suliffeqarfiup ingerlatsinera ingerlaannassapput, suliffeqarfik minnerpaamik 17,2 millionit koruuninik pisariaqartitsisimasoq. Kiisalu unnerluutigineqartut arlallit eqqartuussivimmi nassuiaatigisaat tunngavigalugit tikkuarpaa siulersuisut kisitsisit 12 millionit koruuninut apparsarsimagaat, kisitsit taannaammat Inatsisartuniit qularnaveeqqusissutaasinnaasoq aningaasanik taarsigassarsinissamut tunngaviusinnaasoq, Kisianni akerlianik erseqqippoq, aningaasaliissutit pisariaqartinneqarut pissarsiarineqanngippata suliffeqarfiup aningaasatigut ajalusoornissaa.
Kukkunersiuisoq sumiginnaavoq
Unnerluussisut inatsisilerituuata aammattaaq tikkuarpai kukkunenersiuisup Ole Hansen aamma kukkunersiuisut piginneqatigiit PricewaterhouseCoopers Grønland A/S akisussaaffimminnik sumiginnaasimanerat.
Jesper Mülerrip tamatumunnga tunngatillugu tunngavilersuutaa pinganerusoq tassaavoq, kukkunersiusut apeqqusiinnguarnartik puisut orsuata Kinamut tunisassap akissaa taggissimagaat, kiilumut 10 koruuniniit 500 koruuninut qaffatsinneqarluni, qaffaataasoq 5.000 procentiulluni.
Tamatumunnga ilanngullugu missingersuut isumalluarnartulerujussuuvoq, tassani pivisunngortussatut naatsorsuutigisat aatsaat piviusunngoreerpata suliffeqarfik puisip orsuanik iisartagalianik kinami niuerfimmi ilisimaneqanngitsumi tuniniaanermigut aningaasanik isaatitsilersinnaalluni.
Taamaaliornikkullu kukkunersiuisut missingersuusiorput piviusorsiunngitsorujussuarmik, kisanni Inatsartuni politikkerinik sunniiniarnermut atorneqarsinnaasumik taakku qularnaveqqusiinissaminnut akuersiniassammat, Jesper Müller saqqiusssinermini oqarpoq.
Suliaq ingerlaaqissaaq
Pingasunngorpat Jesper Müllerip ingerlaqqilluni inaarutaasumik eqqartuussivimmi saqqummiussissaaq. Tamatumanilu inatsisilerituup unnerluussissutip aappa qitiutissavaa, tamatumani pineqarluni akiliisinnaajunnaarnermik suliarinnittut unnerluussutaat. Tassani pineqarput 10,9 millionit koruunit assigiinngitsunik sammiveqartut ilaatigut Kinamut aningaasat nuunneqartut annaaneqartullu. Tamakku saniatigut akiliisinnaajunnaarnermik suliarinnittut kissaatigaat suliffeqarfiup pisortaata, ingerlatsinerup siusinnerusukkut unitsinneqarsimannginneranut akisussaatinneqarnissaa.
Ullut eqqartuussinermut atorneqartussat sinneri decembarip arfineq aappaanut tungaanut eqqartuussivimmi saqqummiussinernut atorneqassapput – tamatumani unnerluunneqartut inatsisilerituui saqqummiussissallutik.
Suli ilisimaneqanngikkallarpoq qaqugu eqqartuussutip saqqummiunneqarnissa.