Rekorditoqaq qaangerlugu iviangit tapersikkit

Nuummi arpatsitsinermut ARNANUT arpattartut 121-nit amerlanerit takkuppata, Neriuffiup imgerlataanut »iviangit tapersikkit«-mut ITTU.net 20.000 koruuninik tunissuteqassaaq.

Arnanut arpatsitsissamaalerpoq.

Ukiut tallimarpiaat matuma siorna 1. oktober 2005-imi arpatsitsineq ARNANUT siullermeerluni ingerlanneqarpoq. Illoqarfinni nunaqarfinnilu aqqaneq-marlunni arnat meeqqallu 535-t taamani arpaqataapput, taamaalillunilu arpatsitsineq iluatsilluarluni. Maannalu rekordiliineq qaangerneqassaaq, niuertoq ingerlatsilluartoq Ittu Hviid Nuummi timersortartut atisaannik tuniniaasarfimmik ITTU.net-imik piginnittoq isumaqarpoq.

- Kræftip akiorniarneqarnerani arnat tapersersoqatigiinnertik takutinniarlugu arpaqataasartut nalunngilara, Neriuffimmullu (Kalaallit Nunaanni kræftip akiorniarneqarnerani peqatigiiffik, aaqq.) inuit aningaasanik tunissuteqarnissaannik kajumissaarlugit, sapaatiuppat nuna tamakkerlugu katersiniartoqalerpat. Aaqqissuussineq pitsaalluinnartuuvoq tapersortariaqartoq, qiimmisaarluni Sermitsiaq.AG-mut oqarpoq.

Tapersersortariaqarluinnarmat aningaasivini saqqummerpaa, arnallu anguniagassillugit.

- Aqagu arpatitsinissamut ARNANUT arpattartut 121-nit amerlanerusut takkuppata, taamalu 2005-imi arpatsitsinermi peqataasunit amerlanerullutik, taava »iviangit tapersissavakka«, ITTU.net-imit 20.000 koruuninik tunissuteqarnikkut, Ittu Hviid oqarpoq.

SMS
Nutaarsiassaq tamanna Neriffimmi siulittaasup Johanne Olsen-ip tusarlugu nuannaarutigilluinnarpaa.

- Kræfteqataasartunut arnat nalaattagaannut, soorlu iviangikkut illiallu paavatigut kræfteqartarnerit akiorniarnissaannut, aningaasat taakku immikkut atugassanngortinneqassapput.

Rekordi qaangerneqanngippat aningaasat 10.000 koruuninut ikilineqassasut Ittu oqarpoq.

- Ajunngitsumik anguniagaqarneq taperserumallugu amerlanerujussuit takkutissasut neriuutigilluinnarpara. Taamaattumik ikinngutivut SMS-imik nassiortorneqassapput, aqagu arpannissamut peqataaqqullugit kajumissaarlugit. Nuummiinnaanngitsoq, aammali illoqarfinni nunaqarfinnilu allani. Rekordilu qaangerneqassappat ITTU.net 20.000 koruuninik tunissuteqassaaq.

Una allassimasoq SMS-ikkut ikinngutinnut nassiussinnaavat, aqagu arfininngornermi 2. oktober 2010 arpatsitsineq ARNANUT ingerlanneqalerpat peqataaqqullugit.

Una SMS-ikkut nassiuguk
Arpatsitsinermi ARNANUT-imi rekordip qaangerneqarnissaa peqataaffigiuk, iviangillu taperserlugit. Arpatsitsineq ualikkut marlunut aallartissaaq, arfininngorpallu 2. oktober marluk qeqqanut ornigutissaatit.

Rekordi qaangerneqarpat Neriuffiup ingerlataanut »Iviangit tapersikkit«-mut ITTU.net 20.000 koruuninik tunissuteqassaaq.

Powered by Labrador CMS