Kangermi oqaluffik Nuummilu inissiarsuit
Nuummi illuutit oqaluttuassaqartut ataannernissaat pillugu isumasioqatigiinneq ammarneqarpoq.
Nunaqarfiusimasumi Kangermi oqalffitoqaq kusanaqisoq qatanngutigiinnianit noorlernit sanaeqarsimasoq aserfallakkiartorpoq. Ukiut 40-nngulersut matuma siorna nunaqarfik inuerummalli oqaluffitoqaq aserfallatsaaliorneqarsimanngilaq, apeqqutaaginnalerporlu qaqugu isaannassanersoq.
Nuummi Kangermiut inissiarsuarni najugaqarput, taakkulu oqoqarnermikkut aserfallatsaaliorneqannginnermikkullu inunnit najugaqarfigissallugit tulluarunnaarsimapput. Inissianik piginnittut Namminersorlutik Oqartussat inissiarsuarnik iluarsaassiniarani nakkaannarpoq, taakkulu isaterneqassapput inissiatik nutaanik taarserneqarlutik Kangermiunit najugarissallugit akissaqarfigineqanngitsunik.
Nunatta karsia aningaasameerpoq, aningaasallu amigarisut sunut atorneqassappat : Illuutinut oqaluttuassartaqartunut nunaqarfinnilu avinngarusimasuni inuerussimasunilu imaluunniit inunnut inuusunut inissianut pitsaasunut peqqinnartunullu?
Ataannarnissaannut aqqut nutaaq
Ullumikkut ullut marluk atorlugit illuutit oqaluttuarisaanermut pingaaruteqartut pillugit isumasioqatigiinnerup ammarnerani apeqqut taanna apeqqutigissallugu tuluarpoq. Isumasioqatigiinneq Nunatta Katersugaasiviata Toqqorsiviatalu aaqqissuussaraa Tegnestuen Arkitekti ApS peqatigalugu. Isumasioqatigiinnermi siunertaavoq nunatsinni sumi tamani eriagisariallit ataannarnissaannut aqqutissat nutaat qulakkeerneqarnissaat. Peqataapput inuit Namminersorlutik Oqartussaneersut, kommininit, inissiaatieqatigiinniit, katersugaasivinniit illuliortartuniillu.
Isumasioqatigiinneq ima aaqqissuunenqarsimavoq oqalugiartorqartarluni arlaqartunit akerliusorlu ataaseq aamma saqqummiussisarluni, kingorna apeqqutit tamanit eqqartorneqartarlutik.
Nunatsinni ullumikkut illuutit 79-it eqqissisimatitaapput, Nuummilu qatanngutigiinnianit misilittakkat takutippaat illuutit oqaluttuarisaanikkut pingaarutillit aserfallatsaaliornerat 20.000 kronit 28.000 kronillu akornanni akeqartartut - kvadratmeterimut!
Isumasioqatigiinneq pingasunngorpat ualikkut naammassissaaq siunenrsuisoqatigiinnik illuutilinnut nakkutilliisussanik pilersitsinissaq pisortaqarfinnut illuutinillu piginnittunut siunnersuisussanik eqqartorneqarluni.