Annoncet aamma kalaallisut allassimassapput
Inatsisartuni ilaasortap Malik Berthelsenip piumasaraa annoncet allakkallu nassiussuunneqartut suugaluartut tamarmik kalaallisuumut nutserneqartassasut.
Inuussutissarsiortut naatsorsuutigisinnaavat piumasarineqalissasoq annoncet allakkallu suugaluartut nassiussuunneqartut kalaallisuumut nutserneqartarnissaat. Tamanna takuneqarsinnaavoq naalakkersuisut akissutaanni Siumut sinnerlugu inatsisartuni ilaasortap Malik Berthelsenip siunnersuutaannut akissutaanni, tassani siunnersuutigineqarmat tamani pilerisaarutit aamma atuisunut allakkat suulluunniit nassiunneqartartut pinngitsooratik aamma kalaallisut allagartaqartalernissaat.
– Takornartaanngilaq, minnerunngitsumik maani Nuummi, suliffeqarfiit namminersortunit pigineqartut piseqqusaarutiminnik qallunaatuinnaq allagartalersuisarnerat. Tamannalu taamaattussaannartut ukiorpassuanngulersuni innuttaasunit politikerinillu isigineqartarsimavoq, taama Malik Berthelsen Siumumeersoq siunnersuumminut tunngavilersuivoq..
–Suliffeqarfinnit soorlu makkuninnga, aningaaserivinnit, sillimmasiisarfinnit, naatsorsuuserisunit, inatsisilerituunit kiisalu sanaartoornernik suliaqartunit sullinneqarnermi tamatigorluinnaq allakkat nassiunneqartartut tassaasarput qallunaatuinnaq allassimasut, uparuaavoq.
Taamaattumik inatsisatunut siunnersuutigaa pilerisaarutit aamma atuisunut allakkat suulluunniit nassiunneqartartut pinngitsooratik aamma kalaallisut allagartaqartalernissaat.
– Savalimmiormiut Islandimiullu oqaatsiminnik pingaartitsillutik sumi tamaani namminneq oqaatsiminnik atuinerat assorujussuaq takullugit nuannaartunarput. Savalimmiormiut Islandimiullu taamaassinnaappata aamma neriunaraluaqaaq nunatsinni taamaasinissatsinnut Inatsisartut suliap aallartinnissaanut tapersiiumaartut, taama Malik Berthelsen oqarpoq.
Siunnersuutaalu naalakkersuisunit ilalerneqarpoq taakkuli misissoqqaarumavaat maanna inatsit atuuttoq qanoq periarfissiinersoq.
– Naalakkersuisut siunnersuummut isumaqataapput, taamaattoq Naalakkersuisut qulaajarusuppaat suliffeqarfinni tamani pilerisaarutinik taamatuttaaq atuisunut allakkat suulluunniit nassiunneqartartut pinngitsooratik aamma kalaallisut allagartaqartalernissaat pillugit pisinnaatitsisinnaanermik periarfissat suunersut, ingammik suliffeqarfinni mikisuni naapertuutinngitsumik allaffissornikkut angissusianut naleqqiullugu nammagassiinissaq eqqarsaatigalugu. Qulaajaanerminni suliffeqarfimmi kattuffiit susassaqartullu attuumassutillit peqatigalugit ingerlanneqassaaq, taama akissummini allappoq kultureqarnermut, ilinniartitaanermut, ilisimatusarnermut ilagiinnullu naalakkersuisoq Mimi Karlsen.
Siunnersuut siullermeerlugu inatsisartuni suliarineqassaaq marlunngorneq oktoberip tallimaanni.