Inissiat nutaat takkutilerput

Siunissami namminersorlutik oqartussat ullutsinnut naleqqunnerusunik sanaartortalissapput. Tamanna ilaatigut pissaa ilisimatuussutsikkut siunnersorneqarnikkut.

Ukiuni qulini tulliuttuni namminersorlutik oqartussat inissialiornermut 4 milliard kronit atorniarpaat. Aamma siunissami inissiat allanngorujussuarsimassapput, 60-ikkunni 70-ikkunnilu inissianut sananeqartunut naleqqiullugit.

– Namminersorlutik oqartussat annrtuumik sanaartulerunik iluarsaallutillu teknikkikkut ilisimasat nutaat inuiaqatigiinnilu aaqqiinerit nutaat pisariaqassapput. Taamaattumik Namminersorlutik oqartussat SBi-mi isumaqatigiissuteqarput, ineqarnermut, attaveqarnermut angallannermullu naalakkersuisoqarfik allappoq.

SBi tassaavoq naalagaaffiup sanaartornermut ilisimatusarnermik ingerlatsivia Aalborg Universitetimiittoq.

– Nunatsinni sanaartornissamut malerugassat siunnersuinermi aallaavigineqassapput, tassanilu namminersorlutik oqartussat anguniagaraat, nukissiornerup illullu iluani silaannarmut tunngatillugu nutaanerpaamik sakkortunerpaanillu piumasaqaateqarnissaq, namminersorlutik oqartussat nalunaarput.

Nutaanik inissialiornikkut ilaatigut inissiatoqqat isaterneqassapput, tamannami Nuummi Tuapannguanut atatillugu misilittagaqarfioreersimavoq. Inissiatoqqalli avatangiisinut navianartunik akoqarsinnaapput.

– Maannakkut siunnersuisarnerup saniatigut suleqatigiinnikkut ilisimatusarnikkut ineriartortitsinermilu suliniutit nunatsinni sanaartornermik inissiaqarnermillu pitsannguisussat aallartinneqassapput. Tassani pineqarput piujuartitsineq, eqqagassanik navianartunik PCB-mik akulinnik eqqaaneq, nukimmik atuinikittunik kiassarnerit, issittumi atasinnaasut, aammalu illup iluani nipip tungaatigut pitsanngorsaanerit.

Powered by Labrador CMS