Meeqqat utaqqisut ikilissapput
Naalakkersuisut 2,2 million kronit immikkortippaat Peqqinnissaqarfimmi meeqqat utaqqisut ikilisarniarlugit.
- Nakorsassat qanoq amerlatiginerat apeqqutaalluni meeqqat utaqqisariaqartarnerat pinaveersaartariaqarparput, peqqissutsimut naalakkersuisoq Agathe Fontain knr.gl-imut oqarpoq.
Meeqqat 543-it nakorsanit meeqqat nappaataannik immikkut ilisimasaqartunik misissorneqarnissaminnut utaqqipput, imaluunniit tarnip nakorsaanik naliliiffigineqarnissaminnik utaqqillutik. Aamma meeqqat 137-t siutimikkut suliaritinnissaminnut utaqqipput.
Nakorsanik immikkut ilisimasalinnik amigaateqarneq tassani peqqutaavoq. Taamaattumik peqqinnissaqarfimmiit Danmarkimi nakorsanik immikkut ilisimasalinnik pisisariaqarpugut, utaqqisut ikilisarnissaannut. Sapaatip akunnerini 12-ni meeqqanut narkorsap meeqqat 436-t isumagisussaavai, meeqqanullu tarnip nakorsaata sapaatip akunnerini pingasuni meeqqat 107-it utaqqisut ikilisissallugit.