Inuussutissarsiutigalugu aalisartut ikileriarujussuassapput
Aalisakkanik pisassiissutit nutaat atuutilerpata aalisartut 20 procentii aalisarsinnaajunnaassapput. Aalisarneq attorumaneqanngilaq. Aalisartut amerlassusaat aalisagaqassutsimut naleqqussartariaqarpoq, aalisarnermut naalakkersuisoq Ane Hansen Sisimiuni Polar Fishimi taama oqarpoq.
- Ullumikkut aalisarnermut annertuumik ajornartorsiuteqarnerput ukiorpassuarni attorumaneqarsimanngilaq. Aalisariaatsit nutaaliat atornerisigut aalisakkat inuussutigisavut aalisapilunneqarnermikkut innarlerneqarput. Aalisarneq piffissami sivikitsumi atortorissaarusersuinikkut annertuvoq. Pisuussutit aalisakkat nunatsinni isertitaqarnissatsinnut pingaarnerpaat taama atupilunneqartiginertik attasinnaanngilaat. Aalisartut ikilisartariaqarpavut, Ane Hansen oqarpoq.
Aappaagumiit kinguppannik, qaleralinnik kingusinnerusukkullu saarullinnik assagiarsunnillu pisasiinissat inunnut ataasiakkaanut tunniunneqartalissapput.
Ane Hansenip naatsorsuutigaa aalisartut 20 procentii allamik suliffissarsiortariaqartut, ilaat soraaninngorlutik. Aalisarnermik inuutissarsiuteqartit pikkorissut suliffissaaruttussat ilaat aalisarnermut atortussaminnik aningaasaliisimanermikkut akiitsoqarput.
- Tamanna aaqqiivisisariaqarparput, Ane Hansen oqarpoq, soorlu aamma aalisartunut pisassinneqartussaanngitsunut inuutissarsiutinik allanik nassaartariaqartugut.
- Uulisiulissagutta tulluassaaq ilinniartitsinerit ingerlanneqarnissaat sulisussat ilaat suliffissaqartissinnaaniarlugit, oqarpoq.