Imeq ammut kuuppoq
Qeqqatali Kommuniani kangerluk 1 sanerlugu ukiuunerani illineqarnissaanik nunaminertamik tuninineqarnissamut qinnuteqaammut Landsplansafdelingi "ajoraluartumik taama kingusitsigisumik akissuteqartoq" , pinngortitami pissutsit killormut periuseqarput.
- Uani takuneqarsinnaavoq Landsplansafdelingimi suna suliarinerlugu paasisimasaqarfiginngikkaat, ”Foreningen til Vintersporets fremmemiit” Erik Lomholt-Bek oqarpoq.
Peqatigiiffik arlaleriarluni tuavisaareerluni Landsplansafdelingimit nalunaarfigineqarpoq, qinnuteqaat nunami pissutsinut naalakkersuisoqarfimmimmi avatangiisinut immikkoortortaqarfimmut ingerlateqqinneqarsimasoq, imeqarfiit killeqarfiannut qanippallaarnera peqqutigalugu.
- Akissutip aamma takutippaa nunap assinganik atuarsinnaanngitsoq, imaluunniit uagutsinnut suliaq allat suliaannut paarlaattoorsimassagaat, ukiumimi aqqut imearfiup eqqaaniinngilaq, oqarpoq.
Imeqarfiummi killinganut minnerpaamik kilometerit tallimaapput, nunaminertarlu imeqarfimmiit 350 meterinik appasinneruvoq. Taamaassappammi imeq qummut 350 meterinik ilummullu qaqqap tungaanut 5 kilometerinik kuuttariaqassaaq imeqarfiup killeqarfianut pissaguni, oqarpoq.
Siku saattoq navianartoq
Lomholt-Bekip Landsplansafdelingip qinnuteqaammik sulinera pakatsissutigeqaa.
”Suliap ukioq manna suliarineqarsinnaanera pinngitsoortipparsi. Tamanna inuppassuarnut kangerluup 1-p illuatungaanukarniartunut kinguneqaannanngilaq aammali ajoraluartumik inuit ajutoornissaannik navianartorsiortitsilerpoq, ajorluinnartoqassappat, ukiormi aamma manna kingussissukkut sikunissaanik isikkoqarpoq, sikulu aappallaarsinnaalluni”, Landsplanafdelingimut puffassimaarluni allappoq.
Landsplanafdelingip pisortaata Klaus Georg Hansenip eqqunnginnerarpaa suliaq allamut suliamut paarlaanneqarsimasoq.
- Suliamut allammut paarlaanneqarsimanersoq naluara. Suliaq tusarniaassutigineqarpoq, Lomholt-Bekillu allagaanut annertunerusumik oqaaseqarusunngilanga, oqarpoq.
Kommunimut uterpoq
Suliap kinguarsarnera uggornarluinnarpoq - paasinerluineq peqqutigisimagunarlugu, Det er fantastisk ærgerligt, at det her trækker ud – åbenbart på grund af en misforståelse, ”Foreningen til Vintersporets fremmemi” allatsi Mads Phil oqarpoq.
Landsplanafdelingen mailikkut akivai: ”Qujanaq akissummut. Imeq ammuinnaq kuussinnaammat ilimananngilaq imeqarfiup killinganut pisinnaanissaa”.
- Ukiumili nutaami nunap ammasup aqunneranera allaffissorneralu kommuninut nuussaaq, taava qinnuteqaaterput Qeqqata Kommunianut uteqqissaaq, Taakkumi akuersisussaassapput, oqarpoq.
______________________________________
Ukiumi aqqut naatsumik:
Peqatigiiffik 'Foreningen til Vintersporets fremme' maajimi pilersinneqarpoq. Kinguningualu kangerluk sinerlugu aqqutissamut 275.000 kronit katersorneqarput. Juunip 28-ani nunaminertamik tunineqarnissamik qinnuteqaat Qeqqata Komunianut nassiunneqarpoq, taakkulu aggustip aallartinnerani qinnuteqaat Landsplansafdelingemut ingerlateqqippaat, kommunilli januaarip 1.aniit 2010 nunamut ammasumut nunaminertanik tunniussinissaq akisssaaffigilissavaa. Taamanikkut peqatigiiffik nalunaarfigineqarpoq aggustip naanerani akissutisiumaartoq tusarniaaneq naammassippat.