Issittoq soqutigaara
Ministeriunerup Lars Løkke Rasmussenip Folketingimi ammaanersiorluni oqalugiarnermini Kalaallit Nunaat taanngingajakkamiuk pingaartitsinnginnerunermut takussutissatut isiginngilaa.
Malunngormat ministeriunerup Lars Løkke Rasmussenip Folketingimi ammaanersiorluni oqalugiarnera kalaallit naalakkersuinermik suliaqartut isornartorsiorpaat. Naak nunarsuarmioqatigiinnit Issittoq soqutigineqarluaraluartoq Kalaallit Nunaat oqaaseqatigiinni ataasiinnarni ilanngullugu taaneqarpoq. Oqaluttuarisaanermi aatsaat taama tamanna annikitsigaaq, ingammik nunanut allanut ministeri Lene Espersen nunatsinnik issittumilu pissutsinik taama annikitsigisumik soqitiginnitsillugu. Sisamanngormat unnukkut ammaanersiornermi oqalugiaat pillugu oqallittoqarmat ministeriuneq isornartorsiorneqarnerminut akissuteqarpoq.
- Maluginiarpara Kalaallit Nunaanni tupigineqartoq ammaanersiorlunga oqalugiaatinni Kalaallit Nunaat annikitsuinnarmik taagakku. Tamannai Kalaallit Nunaanni pissutsinut soqutiginninnginnermik tunngaveqanngilluinnarpoq. Imaannerugunarpoq suleqatigiinnerput pitsaasuusoq, aammali Danmarkip maannakkut inissisimaneranut takussutissaalluni. Aningaasaqarnikkut ajornartorsiornerup kingunerisaanik Danmarkimi ajornartorsiutit eqqartorpakka. Taamaattumik nunanut allanut tunngatillugu pissutsit allallu issittumut tunngassuseqartut annikitsuinnarmik eqqaavakka. Imaanngilarli Kalaallit Nunaat soqutiginnginnakku imaluunniit pingaartinnginnakku. Danmarkimi ajornartorsiornitta sammineqarneranik takussutissaaneruvoq.