Danmarkip Portugalimut unamminera TV-kut toqqaannartumik
Meeqqanut aallakaatitsineq, Qanorooq Pulaarfillu piffissamut allamut nuunneqassapput, ullumi Danmarkip Portugalillu unamminerat inissaqartinniarlugu.
KNR aalajangersimagaluarpoq meeqqat isiginnaartartut, Pulaarfik Qanoroorlu peqqutigalugit isikkamik arsaalluni unammineq kinguartitamik aallakaatinneqassasoq.
Akerlianilli KNRT-ip aalajangerpaa unammineq nalunaaqutaq 17.40-miit aallakaatinneqassasoq, taamaalilluni meeqqanut aallakaatitassat sivikinnerullutik, Qanorooq nlaunaaqutaq 20.00 aallakaatinneqarluni kinguninngualu Pulaarfik.
- Isiginnaartut amerlanerit piumasaat malinniarlugu taamatut aallakaatitassat nuussorpavut, KNR tusagassiuutitigut nalunaarummi allappoq.
KNR-p nassuiarpaa, isiginnaartut tamarmik piumasaat naammassineqarsinnaanngitsoq, qilanaaraallu nunatsinni tamarmi DVB-T-p piviusunngortinneqarnissaa.
- Taamaattoqalerpat kanalimi allami aallakaatitanik immikkut ittunik aallakaatitsisinnaalissaagut, KNR allappoq.