Kalaallinut suliniutit tapersersorneqaannassapput
Dansk Folkeparti naalakkersuisut immikkut iliuuseqarnissamut aningaasaliissutit sipaarnissaannut akimmisaartitsivoq, sipaarnikkummi ilaatigut kalaallinut Danmarkimiittunut suliniutit eqqorneqassapput.
- Immikkut iliuuseqarnissamik aningaasaaliissutinik sipaarnissaq ajorpoq, qallunaatummi innuttaassuteqartut taakkua eqqorneqarnissaat ajorluinnarpoq, Dansk Folkepartiimiit Kalaallit Nunaannut Savalimmiunullu tunngasunik oqaaseqartartoq Henrik Brodersen oqarpoq.
Oqaatigaa kalaallit arlaatigut atornerluisartut ajornartorsiuteqartullu tassaammata sanngiitsumik inissisimasut. Ikiuiniarluni suliniutit aqqutigalugit ukiut ingerlanerini attavissaat pilersinneqarsimapput. Taamaattumik pingaartutut isigaa immikkut iliuuseqarnissamik aningaasaliissutit ingerlaannarnissaat.
- Tassaapput immikkut iliuuseqarnissamik aningaasaliissutit pillugit isumaqatigiinniarnissani piumasaqaatitta ilaat. Pissusissamisuunngilaq kalaallit ajornartorsiortut qallunatut innuttaassuseqartut ajortumik inissisimalersinnissaat, Henrik Brodersen oqarpoq.
Suliniutut kalaallinut ajornartorsiortunut tunngatinneqartut ilaatigut tassaapput Koefod Skole, Kalaallit Illuutaat suliniutillu allat. Suliniutit arlallit unitsinneqassapput immikkut iliuuseqarnissamik aningaasaliissutit unitsinneqarpata.