Nuummiut biili innaallagiatortoq soqutigaat

Nuummi biilersinnaanermut allagartalinnut Nukissiorfiit biilit innaallagiatortut marluk innuttaasunut atorneqarsinnaatippaat.

- Inuppassuit soqutiginnittut aggiapput biili misilinneqarsinnaalermalli, Nukissiorfinni ineriartortitsinermut siunnersorti Jens Peter Bak Hendriksen oqaluttuarpoq.

Nukissiorfiit Amisunit nalunaaqutaq 11-miit 14-imut biilit innaallagissamik ikummateqartut innuttaasunit biilernermut allagartaqartunit misilinneqarsinnaatippaat. Sermitsiaq.AG-mi tusagassiortoq nalunaaqutaq 13 biilermat, inuit 50 missaniittut H.J. Rinksvej kaajallassimavaat.

Biilereerluni sajuppoq

Søren Lynge biilereerluni sajuttuinnaavoq.

- Torrak. Sukkasuumik sukkatsittarput, sungiunniagassaavorli, Søren Lynge oqaluttuarpoq.

- Taamaattunik biilinik pisineq akisuvoq. 300.000 kronit assartornera ilanngullugu. Kisianni biili 160 kilometerinik ingerlasinnaavoq 35 kronit nalinginut immersoreerlugu. Biilimit dieselitortumit imaluunniit benzinatortumit piffissaq sivisoq isigalugu akikinneruvoq, Søren Lynge oqapoq.

Sofie Rossenip aamma biili misilippaa.

- Marluinnarnik tukkarfissaqarmat annilaangalaarpunga. Ingerlaarnera tamaat bremseqattaarpunga, Sofie Rossen illarluni oqarpoq.

Biilip innaallagiatortup nunatsinni siunissaa pissanngatigaa.

Tusagassiortoq aamma biilerpoq, nipaatsuullunilu ilorfisimaarnarpoq. Eqqaamasariaqarpoq biilli automatgeareqarmat, marluinnarnillu tukerfissaqarluni.

Powered by Labrador CMS