Sulitilluni ajoqusernermut inatsit isumagiumanngilaat
Ukiumi nutaami nunatsinni sulitilluni ajoqusernermut inatsit nutaaq atuutilissaaq, namminersorlutilli oqartussat suliassaq tigujumanngilaat.
Danmarkimi suliffeqarnermut ministeri Inger Støjberg nunatsinni sulitilluni ajoqusernermut inatsimmik nutaamik siunnersuuteqarpoq januaarip 1-aniit 2011-miit atuutilersussamik. Inatsimmi nutaami nunatsinni pissutsit eqqarsaatigineqarput.
Webavisen.gl allappoq Namminersorlutik Oqartussat sulitilluni ajoqusernermut tunngatillugu suliaq akisussaaffigerusunngikkaat. Taamaattumik Danmarkimi Arbejdsskadestyrelsenimiit nunatsinni sulitilluni ajoqusernissamut isumannaallisaaneq aqunneqassaaq.
Nuummi sulisut ullumikkut nunatsinni aaqqissuussinermik aqutsisut siunissami Arbejdsskadestyrelsenip ataani sulilissapput Namminersorlutik Oqartussaniunngitsoq.
Inatsisartut maajimi upernaakkut ataatsimiinnermi nunatsinni sulitilluni ajoqusernermut inatsimmut siunnersuut tamarmiullutik akuersaarpaat. Namminersorlutik Oqartussat kissaatigippassuk susassaqarfik taanna qaqugukkulluunniit akisussaaffigineqalersinnaavoq.