Kangerluarsunnguani tamanut illuaraq
Nuummi attaveqaqatigiittartut tamanut atorsinnaasumik unnuisarfeeraliorsimapput.
Inuit attaveqaqatigiittartut Naleraq tassaapput inuppaaluit Nuup eqqaanilu angalaarnermik nuannarisallit. Taakkulu Kangerluarsunnguani nutaamik illuaraliorsimapput kikkut tamarmik unnuiffigisinnaasaannik.
- Attaveqaqatigiiffik ukiualunnit atasimavoq, aatsaat maannakkut unnuisarfeeqqamik pilersitsinissaq nukissaqarfigineqalersimavoq aningaasassaqalerlunilu, taamaalillunilu tupermi unnuinissaq pisariaarulluni, akerlianilli illermi sinissinnaalluni kangerlummut isikkivigeqaluni nerisinnaallutik, Naleraq tusagassiuutitigut nalunaarummi allappoq.
Illuaqqamiissinnaapput inuit marluk-sisamat, atornissaanullu piumasaqaataavoq illuaqqap eqqaatalu eqqiarlugulu saligaatsunngortissimanissaa.
Arfininngorpat atoqqaartinneqassaaq
Arfinngorpat oktobarip 16-ani nal. 12 illuaraq persuarsiornertalimmik atoqqaartinneqassaaq.
- Sanaartornermik ilinniarfik suleqatigalugu illuaraq sananeqarpoq, ilinniartut sanasuullutik. Nurepa, permagreen, Trælasten XL-Byg, Sanasoq Nuuk aamma Malermesteren Simon Fontain atortussanik tunisisuupput sakkunillu attartortitsillutik, Naleraq allappoq.