Kaasuartagallit eqaarsaarlutillu ikumatitalisartut
Qeqqata Kommuniani innarluuteqarnermut sapaatip akunnerani aallartittumi arlalinnik aaqqissuisoqarpoq.
Pingasunngornermi Maniitsumi kaasuartakkanik qamutilinnut eqaarsaartitsisoqassaaq.
- Kaasuartakkanik qamutillit eqaarsaarneranni kikkut tamarmik tikilluaqqusaapput, kaffeqarluni, teeqarlunilu kaageqassaaq. Aamma pingasunngornermi tallimanngornermilu Naapiffik tamanut ammassaaq. Tallimanngornermi Naapiffimmi atuisut suliaminnik tuniniaassapput, Qeqqata Kommuniani innarluutilinnut sapaatip akunneqartitsinermut atatillugu nittartakkami allassimavoq.
Sisimiuni sapaatip akunnera tamaat sammisaqartitsisoqassaaq
Sisimiuni innarluuteqarnerup sapaatip akunnera aallartillugu iliveqarfimiit Taseralimmut ikumatitalisarluni ingerlaaqatigiittoqassaaq nal. 19.30.
- Nunatsinni tamarmi innarluuteqarnermut sapaatip akunnera toqusimasullu ukioq manna eqqaaniarpavut, pisussat allattorsimaffiani allassimavoq.
Aamma Sisimiuni sapaatip akunnera tamaat aaqqissuisoqassaaq soorlu arsaattarfimmi, sannavimmi illersukkami 'Pisumi' matut tamanut ammarneqarlutik, Asummiunilu grillertoqarluni sapaatip akunnerani naggasiilluni.