Aalisartut akerliussutsimik takutitsissapput
Akerliussutsimik takutitsineq Inatsisartut ataatsimiittarfiata saani naammassineqarpat aalisartut atukkatik pillugit allakkiat Naalakkersuisunut tunniutissavaat.
Marlunngornermi oktobarip 12-ani aalisartut akerliussutsimik takutitsissapput, nalunaaqutaq 12.15 aalisartut piniartullu kattuffiata KNAPK-p saani aallartittussamik.
Aalisartut allagartarsualisarlutik namminersorlutik oqartussanut ingerlaassapput, atukkatik pillugit allassimasut naalakkersuinermik akisussaasunut tunniutissallugit.
Aalisartut piniartullu tunitsivinni akiluttortinneqarnertik tunitsivissaaleqinertillu naammaginngilaat. Aamma isumaqarput pisaassat aningaasaliissutillu annikippallaartut ikummatissat akii qaffakkiartortillugit puisillu amiinik tunisinissamut periarfissat ajorsiartortillugit.
KNAPK-p Nuummi immikkortortaa NAPP akerliussutsimik takutitsinissamut suliniuteqartuuvoq.
– KNAPK-p siulersuisuiniit aamma uagut sinerissami immikkoortortat kjumissaarpavut atukkatik pillugit saqqummeeqqullugit, KNAPK-mi siulittaasoq Leif Fontaine Sermitsiaq.AG-mut oqarpoq.
NAPP ullumikkut akerliussutsimik takutitsinissamut ataqatigiissaarisuuvoq. NAPP-mi siulittaasoq Lars Mathæussen Sermitsiaq.AG-mut oqarpoq Siorapalummiit, Savissivimmiit, Uummannamiit, Saqqamiit, Ilulissaniit, Qeqertarsuarmiit, Ikerasaarsummiit, Qasigiannguaniit, Kangaamiuniit, Atammimmiit, Nuummiit, Qeqertarsuatsiaaniit, Paamiuniit, Arsummiit, Qaqortumiit Alluitsup Paaniillu tapersiiniutinik tigusaqarsimallutik.
– Aamma Ilulissani akerliussutsimik takutitsisoqassaaq, Lars Mathæussen nalunaarpoq.