Neqaarniatut ilinnialerput

Narsami toqoraavimmi 'Neqimi' neqaarniatut ilinniartut savaaqqanik toqoraasoqarnerani ilinniarnertik aallartippaat.

Kommune Kujallermi iluarisimaarneqarpoq Neqimi neqaarniatut ilinniartunik aallartittoqarsinnaammat. Inuutissarsiornermut suliffeqarnermullu ataatsimiititaliami siulittaasoq Kalistat Lund Neqip, Inuilip, Namminersorlutik Oqartussat Kommunillu kujalliup suleqatigiinnerisigut ilinniartoqarneq aallartissinnaammat nuannaarpoq.

- Ilinniartoqalerneratigut naalakkersuinikkut kissaataasarsimasoq annertooq piviusunngortinneqarpoq, tassalu Narsami toqoraanermi nammineq ilinniarsimasunik sulisussaqalernissamik kissaateqarneq. Aamma nioqqutissanik ineriartortitsinissamut periarfissaqalerpoq, inuussutissalerinerullu iluani ukiut kaajallallugu sulisussaqalissalluta arlalinnik, Kalistat Lund oqarpoq, nangillunilu:

- Taamaattoq ukioq manna toqoraanermi avataaniit sulisoqartariaqarpoq, taakkulu toqoraanerup nalaani ilinniartunut ilitsersuissapput qulakkeerlugulu toqoraaneq sukkasuumik pitsaasumillu ingerlassasoq. Toqoraaneq savaatillit kingusinnerusukkut toqoraasoqarnissaamik kissaataat malillugu ingerlanneqarpoq, tassani siunertaalluni savaaqqat oqimaannerunissaat.

Powered by Labrador CMS