Greenpeacemi akerliuniat tigusarineqarput

Marlunngormalli Greenpeacimi akerliuniat Baffinip kangerliumarngani Cairn Energyp qilleriviani tiguaasut sakkortuumik anorlerneratigut akerliuniarnertik taamaatittariaqarpaat.

Ullualuit qaangiuttut Greenpeacemiit akerliuniat Cairnip qillerivianut najummatsernertik sapilerpaat. Politiinut utaqqisunut tingitaaginnarput. Assi: Greenpeace.

Akerliuniat marlunngormat Qeqertarsuup kitaani qillerivimmiittut unitsitsinnartariaqarsimapput. Akerliuniallu tigusarineqarput, nillertumik sakkortuumillu anorlernera peqqutigalugu, Greenpeace tusagassiuutitigut nalunaarummi alappoq.

- Uuliasiorluni qillerinerit ulluni marlunni pinngitsoortippavut, issittulli silaa ajugaavoq. Tulluussimaarutigaarput Cairn ilisimatissinnaasimagatsigu, uuliasiorneq navianartoqaqisoq sianiilliornerujussuusorlu, qallortut ilaat Sim McKenna oqarpoq.

Qallunaat nalunaaqutaat malillugu ippassaq unnukkut akerliuniarnerup unitsinnissaa aalajangerneqarnat, akerliuniat qilleriviup Sten Donip qaanut qaqipput, tassani politiit utaqqisut. Akerliuniat erngerlutik tigusarineqarput.

Marlunngormat ullaakkut qallunaat nalunaqutaat malillugu arfineq pingasunngortoq akerliuniarneq aallartippoq, akerliuniallu sisamat qgummibådenik qillerivimmukarput qallorlutillu. Tassani toqqit nivingasut marluk ikkuppaat allagartarsuillu oqaaseqaatiti ima oqaasertallit nivinngarlugit 'Issittumi uuliamik qillerinerit unitsillik'.

Greenpeace ulluni qulingiluani umiarsuartik Esperanza atorlugu qilleriviup eqqaaniipput, BP-mi uuliamik maqisoornerujussuup kingorna issittumi uuliamik qillerinerit akerliuffiginiarlugit.

Powered by Labrador CMS