Ilulissani uulia pillugu ataatsimeersuarneq
Uuliasiornikkut ineriartornissamut periarfissat Ilulissani eqqartorneqassapput nunatsinniit, Norgemii, Canadamiit Danmarkimiillu peqataasoqarluni.
Tassaapput nunatsinni sulisitsisut peqatigiiffiat GA, Offshore Center Danmark, Aasiaat Erhvervsråd aamma Qaasuitsup Kommunia, Qeqertarsuup kitaani uuliamik ujaasisoqarneranut atartillugu periarfissat pillugit ataatsimeersuarnermik aaqqissuisut.
Ataatsimeersuarnissamut 65-it peqataaniarlutik nalunaarsimapput, peqataasussallu nunatsinniit, Norgemiit, Canadamiit aamma Danmarkimeersuussapput, Qaasuitsup kommunea nittartakkamini allappoq.
– Soqutigineqarnera annertusimaqaaq, peqataasussallu qanoq amerlatigisinnaanerannut siunniussarput sipporlugu peqataasoqassaaq, Qaasuitsup Kommuniani aatsitassanut tunngatillugu ataqatigiissaarisoq Hans-Peder Christensen oqarpoq.
Ataatsimeersuarnerup siunertaa ukiuni tulliuttuni uuliasiorneq ingerlanneqarlerpat suliffeqarfiit paasissutissinnissaat. Aamma peqataasut avataani uuliasiortunut pilersuinissamut piumasaqaatit pillugit saqqummiussivigineqassapput.