Greenpeace: - Oqallinnermik pilersitsivugut
- Kalaallit Nunaanni misiliilluni qillerineq sammilersinniarlugu iliuuseqarneq iluatsippoq, Greenpeacep generalsekretæria Mads Flarup Christensen Sermitsiamut oqarpoq.
Greenpeacemit akerliuniat sisamat unnuaq nunatsinni politiinit tigusarineqarput. Taakkua tassaapput polenimiu, tyskeq, amerikarmiu finlandimiorlu, taakkualu nunanit allaneersuummata ulluni pingasuni parnaarussaaqqasinnaapput politiinit unnerluutigineqartinnatik. Greenpeacep qillerivimmut qallorlutik tigusaasut oqaloqatigisimavai oqarporlu tamarmik ajunngitsut Aasiannilu politiinit iluamik pineqartut.
Sisamat tigusarineqarmata iliuuseqarniarneq unitsinneqarpa? Iliuuseqarnerlu Greenpeacemut iluatsippa?
- Ingerlaqqinneq pillugu oqaaseqanngisaannarpugut, kisiannili aap, anguniakkavut anguvagut. Tassalu Kalaallit Nunaanni misiliilluni qillerinerit pillugit oqallitsitsinissaq. Aamma Cairnip qillerineri ulluni marlunni unitsippavut, taamaattumik iliuuseqarnerput marlutsigut iluatsippoq, generalsekretær Mads Flarup Christensen Sermitsiaq.ag-mut oqarpoq.
- Iliuuseqarnissi Kalaallit Nunaanni akerlerineqarnera paasisinnaaviuk?
- Aap, paasisinnaavara. Greenpeace sassarteraangami nuannarinneqqusaannermi ajugaaneq ajorpoq. Kalaallilli namminersulivikkusunnerat iluarisorujussuuvara, tamassumali tungaanut iliuuseqarniarpugut ajornartorsiutit ajoqutaasinnaasullu sammilersinniarlugit, Kalaallit Nunaata uuliasiorniarnerani. Nunap iluani nunarsuarmilu tamarmi. Aamma neriuutigaarput iliuuseqarnitsigut Cairn Energy uuliamik qillerinermini immikkut mianersornerulissasoq, taamaasilluni qillerinerit Kalaallit Nunaanni avatangiisinik aserueqqunagit. Neriuppunga tamanna kalaallit paasissagaat.
Mads Flarup Christensenip ilanngullugu oqaluttuaraa umiarsuaq maannakkorpiaq Aasianniittoq, qanorlu iliuuseqarnisartik isumaliutigiigitsik.