Cairn kalaallinik suleqatissarsiorpoq
Sinerissap avataani sulinermi suliffissat pillugit oqallinneq Ilulissani aallartinneqarpoq
Qeqertarsuup kitaani qillerinerit 2011-mi aallarteqqinneqarpata suliassat kalaallit suliffiutaasa neqerooruteqarfigisinnaasaat skotlandimiut uuliasioqatigiffiata Cairnip septemberip 28-ianni Nuummi ataatsimiinnermi saqqummiutissavai.
Aatsitassanut naalakkersuisoq Ove Karl Berthelsen, Inuit Ataqatigiit, suliffeqarfiit nunatta nunataani uuliamik pinngortitallu gassianik ujaasinermi peqataaffigisinnaasamikkut peqataaniaqqullugit kajumissaarpai. Ataasiakkaarlutik sulissanilluunniit annertuunik kivitseqatigisinnaasaminnik suleqateqarlutik.
Kalaallit Nunaanni suliffeqarfiit sinerissap avataani sulinermi peqataanissaannut kajumissaarineq sapaatip akunnerata naanerani Ilulissani aallartinneqarpoq - taamatullu aamma Sigguk-feltemi, Cairnip septemberimi sisamariarluni ujaasilluni qilleriffigisassaani.
Naalakkersuisut kommunillu avannarliit pingasut Sermersuup, Qeqqata Kommuniata Qaasuitsillu Kommuniata kalaallit uuliasiornermi peqataanissaat pillugu Cairn isumaqatigiissuteqarfigereersimavaat, naalakkersuisullu ukiuni aggersuni uuliasiorneq siunnerfigalugu sumiiffinni sulisartunik ilinniartitsisussaapput.
– Uuliasiulivinnissatsinnut Kalaallit Nunaat sulisussanik piareersimasuuteqartariaqarpoq, Ove Karl Berthelsen oqarpoq, suleqataanisamillu Cairnimut isumaqatigiissut atorlugu ukiut ingerlanerini kalaallit pilersueqataasut amerliartuinnarnissaannik piumasaqarniarluni.
Aatsitassarssiornerup inuussutissarsiutini pingaarnersanngoriartornissaa naalakkersuisut anguniarpaat, siunertarli anguneqassappat sumiiffinni sulisartut sumiiffinnilu suliffeqarfiit sapinngisamik annerpaamik peqataanissaat anguniarneqartariaqarpoq.
Taamaattumillu Ove Karl Berthelsenip suliffeqarfiit ataatsimeersuarnermi peqataasut suleqatigiileqqullugit allaallu illoqarfinni allaniittunik suleqatissarsioqqullugit kajumissaarpai: – Taamaaliunngikkutta unammilleqataasinnaassannginnatta.