Red Barnet: Kalaallit meerataat utoqqatserfigaagut

Pinngitsaaliilluni nuutsitsinerit meeravissiassanngortitsinerillu ingasappallaarujussuarput, ullumikkullu meeqqanut pitsaanerussut tunngavigalugit ingerlatsinermiit ungasissorujussuullutik.

Red Barnet 1950-ikkunni kalaallit meeqqat 22-it Kalaallit Nunaanni ilaqutaanniit peersinneqarnerannut peqataasimaso taamatut erseqqilluinnartumik utoqqatserpoq. Taakku qallunaanngorsarniarlugit Danmarkimut aallartinneqarsimapput, Kalaallit Nunaannut uteqqikkunik nunaminni inerisaanermut peqataaniassammata.

– Erseqqissumik ilisimanngilarput taamanikkut Red Barnet-iusoq qanoq sunniuteqaqataasimanersoq, tamanna suli misissorneqarmat. Tamanna apeqqutaatinnagu uannga ingerlatsivipput sinnerlugu kalaallit angutit arnallu, meeraatillutik taama sakkortutigisumik alianartigisumillu pineqarsimasut qamannga pisumik utoqqatserfiginiarpakka, Red Barnetip generalsekretæria Mimi Jakobsen tusagassiorfitsigut nalunaaruteqarluni allappoq.

Rirtsau taama allappoq.

Kalaallinik meeqqanik pinngitsaaliilluni aallartitsisoqarsimanera oqaluusereqqinneqalermalli Red Barnet namminerluni taamanikkut Red Barnet-ip qanoq peqataatigisimaneranik misissuilersimavoq. Toqqortaatinik suli misissuisoqarpoq.

– Misissuineq suli naammasseqqajanngilaq, isumaqarpugulli pinngitsoorani utoqqatsertoqartariaqartoq. Pisimasut allanngortinneqarsinnaanngikkaluarpataluunniit. Taamanikkut pissutsit qanoq allaanerutigisimagaluarpataluunniit meeqqat ajunnginnerpaamik isumaqarluni ajorluinnartumik pineqarsimapput, tamakkulu qulaajarneqartariaqarput taamaaliornerullu eqqortuunnginnera nassuerutigisariaqarparput, Mimi Jakobsen oqarpoq.

Powered by Labrador CMS