Sumut iluarsaanneqarpoq
Kalaallit Illuutaata nutarterneqarnera A.P. Møller fonden-imit aamma Augustinusfonden-imit aningaasalerneqarpoq.
Københavnimi Kalaallit Illuutaanni kalaallit eqqumiitsuliaannik katersugaasiveqalernissamik sinnattu piviusunngortinneqassaaq, illullu nutarterneqarnerata immikkoortuata aappaa aallartinneqarpoq.
Taamatut allappoq sumut.dk.
Pilersaarutaavoq ini, ilassinnittarfittut aammalu kulturimut paasissutissiinermullu immikkoortoqarfittut atorsimasoq siunissami eqqumiitsulianik katersugaasiviussasoq kalaallillu eqqumiitsuliaannik tuniniaasarfiulluni. ilassinnittarfiup nutarterneqarnera septembarimi aallartinneqassaaq naatsorsuutigineqarporlu 2010-mi decembarip naalernerani naammassineqassasoq.
Tamatuma saniatigut illup saqqaa nutarterneqarpoq. Marraasersorneri piiarneqassapput nutaamillu marraasersorneqassalluni. Kingorna saqqaa salinneqassaaq, igalaat qalipanneqassapput, marraani illernaasat il.il. nutarterneqassapput. Sanasut aggustimi aallartipput naatsorsuutigineqarporlu 2010-mi oktobarip qiteqqunnerani naammassissasut.
Suliniutit piviusunngortinneqarput ukunannga aningaasalerneqarluni: Augustinus Fonden 250.000 koruuninik aamma A. P. Møller og Hustru Chastine Mc-Kinney Møllers Fond-imit 2 millioner koruuninik.