Nunatta kulturia tjekkiamiusut
Ole G. Jensenip atuakkiaa ilisaritinneqassaaq kalaallit pisortatigoortumik Tjekkiamut tikeraarnerannut atatillugu.
Ole G. Jensenip atuakkiaa nuannarineqartoq, Kalaallit kulturiannik takussutissamerngit - nunatta kulturitoqaa pillugu - siullermik 2007-imi saqqummersinneqarpoq naqiterisitsisarfiullu milik-ip saqqummersittagaani tunineqarnersaasimalluni. Kalalalisut, qallunaatut, tuluttut, tyskisut franskisullu saqqummersinneqarsimavoq, tuluttoortaalu pingajussaa naqiterneqaqqammerpoq.
Maannalu aamma tjekkiamiusut saqqummersinneqartussanngorpoq - ateqarluni Stripky grónské kultury.
Danmarkimi tjekkiap ambassadøriata Zdenek Lycka-p atuagaq nutsersimavaa, taannalu saqqummersitsisarfikkut Triton saqqummersinneqassaaq.
Kalaallit aallartitaat Inatsisartut siulittaasuat Josef Motzfeldt siuttoralugu septembarip aallartinnerani Tjekkiamut tikeraassapput, atuakkallu Kalaallit kulturiannik takussutissamerngit tjekkiamiusuuva ilisaritinneqassaaq ullumi Prags Hovedbibliotek-imi, assinik saqqummersitsineq 3913 Tasiilaq ilutigalugu - taanna aamma Ole G. Jensenip saqqummersitaraa nunatsinni illoqarfik pillugu. Ole G. Jensen Qaqortup katersugaasiviani pisortaavoq.