Cairnip aalassassimaartoqaqqinnissaa kissaatiginngilaa
Naak Cairn Energy nunatta eqqaani misileraalluni uuliamik qillerinermini Greenpeacep iliuuseqarneranik ullunik marlunnik kinguarsarneqaraluarluni eqqartuussisulersuussinianngilaq.
Cairn Energy Greenpeacemik eqqartuussisulersuussinissaminik pilersaaruteqanngilaq, naak sapaatip akunnerani kingullermi suliniaqatigiiffimmit akerliuniat uuliasioqatigiit Kalaallit Nunaata avataani Qeqertarsuup kitaani misileraalluni uuliasiornermini ullunik marlunnik kinguarsarneqaraluarluni. Taama uuliasiorfik KNR-imut nalunaarpoq.
UUliasiorfimmiit qillerinerit aallarteqqinneqarput, isumaqarpullu unitsitaagallarsimaneq aasaanerani qillernissamik pilersaarutinut sunniuteqassasut.
Sapaatip akunnerani kingullermi Greenpeacep iliuusai aallartipput, akerliuniat sisamat gummibådinik qillerivimmut Stena Donimukarput, qallorlutik pituttorlutilu.
Unnuaq ataaseq tuperni sungaartuni nivingasuni unnuipput, issinneranik anornerneranillu taamaatiinnartariaqarlutik. Norgemiit, Tysklandimiit, USA-miit Finalndimiillu akerliuniat politiinit tigusarineqarput nunatsinniillu anisinneqarlutik.
Greenpeacep silaannaq pillugu sulisuata Jon Burgwaldip iluarisimaarpaa, Cairn Energyp eqqartuussisulersuunnianngimmatik.
- Allangortoqanngilarli, Cairn Energylu uanga isinni pitsaanerulinngilaq, oqarpoq.
Greenpeacep eqqartuussisulersuunneqarnissartik akiliisinniarneqarnissartillu piareersimaffigigaluarpaa, tassunga aningaasanik illuartitsereerlutik, KNR-imut oqarpoq.
Greenpeacep umiarsuaa Esperanza Kalaallit Nunaanniit aallareerpoq.