Kalaallit meeqqat Danmarkimut feriartut

Kalaallit meeqqat arlallit Danmarkimut tikeqqammerput. Sapaatip akunnerani ataatsimi feeriarnerminni ulluinnarni atukkatik artornartut qimalaassavaat.

Kalaallit meerartaat ilaqutariinnit atugarliortuneersut Danmarkimi feeriartilaarniarlugit Dansk Folkehjælp 1 million koruuninik katersuisimasoq. Ass.:Leiff Josefsen

Dansk Folkehjælpip ambassadørtit qulit suleqatigalugit kalaallit meeqqat arlalllit, ulluinnarni atukkaminnit allamut saalaarnissaminnik pisariaqartitsisut, Danmarkimi feriarnissaat suliniutigisimavaa.

Taamatut allappoq Kristeligt Dagblad.

Siullermeersumik Dansk Folkehjælp kalaallinik meeqqanik feriartitsivoq. Qularnanngitsumilli kingullersaassanngilaq. Dansk Folkehjælpip neriuutigaa siunissami ukiut tamaassa kalaallit meeqqat holdit marluk feriartittalerniarlugit.

Kalaallit Nunaanni meeqqat inuusuttullu tamarmiusut pingajorarterutaat angerlarsimaffimminni akuttunngitsumik imaluunniit ilaanneeriarluni sumiginnarneqartarput inersimasut atornerluinerat pissutigalugu. Nerisaqarnerlutsinneqarnermik, atornerluinermik, nakuusernermik qanigivallaakkamillu atoqateqarnermik ajornartorsiutit qallunaat meerartaaninngarnit kalaallit meerartaanni akulikinnerujussuarmik atugaapput.

Powered by Labrador CMS