'N
Paarisap tv-kut radiukkullu atoqatigiittarneq inooqatigiinnerlu pillugu aallakaatitassiai dvd-ngortinneqarput Paarisallu nittartagaaniilerlutik.
Paarisap nittartagaani 'Nûno tutillugup' saqqummersinneranut peqqutaavoq, atoqatigiinneq isumannaatsumillu atoqatigiinneq pillugu soqutisaqartut paasiniaasinnaanissaat, nanoq.gl allappoq.
Nûno tutillugu DVD-nngortinneqarnerani siunertarineqartoq tassaavoq, atuartitsisut aamma peqqinnissamik suliaqartut tapertatut fagini soorlu; inuiaqatigiilerinermi, ilaqutariinnilerinermi aammalu atoqatigiinneq pillugit atuartisinermi tapertatut atorneqarsinnaanissaa.
Aallakaatitassiat inuusuttunut inersimasunullu naatsorsuussaapput. KNR suleqatigalugu aallakaatitassiat KNR-ikkut 2009-mi 2010-milu ukiuunerani siullermeerlutik aallakaatinneqarput.
AARISA 2010-mi apriilimi HS Analyse misisissuilermat Nûno tutillugu pillugu apeqqutinik ilanngussinermigut peqataavoq. Misissuinerup takutippaa angutit 63 %-iisa aamma arnat 71 %-iisa aallakaatitassiarineqartut arlallit isiginnaarsimagaat. Isiginnaartartut aallakaatitassianut naliliinerat qaffasippoq, tassami angutit 67 %-iisa arnallu 70 %-iisa aallakaatitassiat pitsaalluartuusutut nalilermatigit.
Misissuinerup aamma takutippaattaaq, aallakaatitassiat atoqatigiittarneq pillugu oqallitsitsilluarsimasutut. Aallakaatitassiat imarisaat aallakaatinneqareernerata kingorna illoqarfimmiuunerusunit nalunaarutigineqarpoq oqaloqatiginnissutigineqarsimasutut imaluunniit allaaserinnissutigineqarsimasutut Paarisa allappoq
DVD-t meeqqat atuarfeqarfiinut, ilinniarfeqarfinnut, napparsimavinnut aamma peqqissaavinnut atuakkanillu atorniartarfinnut tamanut nassiussuunneqassapput.
DVD-mi aallakaatitsisup Nûno Isbosethsenip siniffissuarmi maavaartumi pulaartini arlallit apersorpai, assersuutigalugu ”atoqatigiinneq sunaana?” aamma ”atoqatigiinneq pillugu suut ilisimavigit?”.
Aallakaatitassiani pingaarnertut qulequtaritinneqartut tassaapput:
1. HIV AIDS-ilu – Nunarsuatsinni ajornartorsiutit, TV-kkut aamma radiokkut
2. Atoqatigiinneq kisermaallu
3. Aappariinneq atoqatigiinnerlu
4. Arnanuinnaq
5. Angutinuinnaq
6. Naartuersittarneq – tv-kkut aamma radiokkut
7. Atoqatigiinneq, angajoqqaat inuusuttullu
8. Suiaaqatiminnik atoqateqartartut – tv-kkut aamma radiokkut
9. Kinguaassiuutitigut nappaatit – atugaalluarput
10. Naartuneq ilaqutariinngornerlu – tv-kkut aamma radiokkut