Oqaluttuarisaaneq ilinniarfigisariaqarparput
Taama oqarpoq Kunngissaq Frederik filmi Eksperimentet takoreerlugu.
Marlungormat unnukkut Københavnip qeqqani filmertarfimmi Dagmarimi Louise Friedbergip filimilaa 'Eksperimentet' taketeqqaarneqarmat Kunngissakkut, Folketingimi Kalaallit Nunaat pillugu ataatsimiititaliaq, isiginnaartitsisartut tusaamasat allallu suleqataasut peqataapput.
Filmereernerup kingorna kunngikkormiut torsuusamiipput. Kunngissaq filmimit attortissimarpasippoq.
- Filmi suliarilluagaavoq, kusanaqisumi immiussaalluni. Attortinnarpoq, Kunngissaq Sermitsiaq.AG-mut oqarpoq.
- Filmi ilinniarfiulluarsinnaavoq, oqaluttuarisaanerlu ilinniarfigisariaqarparput. Tine Bryldillu allanneratuut aamma oqartoqarsinnaavoq, tamanna pitsaanerpaamik isumaqarluni pisimasoq, Kunngissaq oqarpoq.
Kungnissap Frederiup aamma oqaatigaa Eksperimentet qallunaat oqaluttuarisaanerani nuaniilluinnartuusoq.
Kunngissakkut immikkut qaaqqusat ilassiornissaannut piffissaqarput. Kunngissap nuliata Maryp naartusup meeqqat isiginnaartitsisartut qiimalluni sammivai, kunngissarlu filmi pillugu paasiniaavoq. Ataqqinartorsuup marlulissat Eva Illum Jørgensen aamma Marie de Renouard oqaloqatigai, taakkuuppummi taamanikkut nunatsinni 50-ikkunni misileraanermik eqqugaasut.