Venstre utoqqatserusunngilaq

Kalaaliaqqat 22-it misileraaffigineqarnerat ileqqorissaarnikkut kukkunerunngilaq - taamanikkut ilisimasat aallaavigalugit, ministeriuneq isumaqarpoq.

Ministeriuneq Lars Løkke Rasmussen imaluunniit Venstreni nunarput pillugu oqaaseqartartoq Flemming Møller utoqqatsernissaminnut tunngavissaqarsorinngillat. Assi: Jens Dige/Polfoto

1950-ikkut aallartilaarneranni siuttussanik pilersitsiniarluni suliniuteqarnermi ajutoorfiusumi illuatungiliuttut partiivi arlaqartut meeqqanut meeqqat angerlarsimaffiitinneqartunut utoqqatsernissaminnut piumassuseqarput. Naalakkersuisooqatigiinnillu siuttuusut Venstre saammaasseqqatigiinnissamut piumassuseqanngillat, naak taamanikkut 1951-imi Danmark talerperliunianiit Venstrenit aqunneqartoq Erik Eriksen ministeriunerulluni. Maannakkullu partiimiit Kalaallit Nunaat pillugu oqaaseqartartoq Flemming Møller isumaqanngilaq pisortatigoortumik utoqqatsernissamut tunngavissaqanngitsoq.

- Peqqissimigaanni aatsaat utoqqatsertoqartarpoq. Kalaaliaqqanulli taamanikkut iliuuserineqartut taamani ilisimasat tunngavigalugit ileqqorisaarnikkut isornartoqanngilaq, isumaqarpoq.

Flemming Møller akerlianik isumaqarpoq, pinngitsaaliilluni arsaarinninneq Danmarkip oqaluttuarisaanerani allassimassasoq kukkusumik politikeqarnertut, misilittakkatullu ajorluinnartutut.

Politikki taamaattooq kukkunerusoq atuakkiortup isumaginninnikkulu siunnersortip Tine Bryldip isumaqatigiilluinnarpaa. Sulili isumaqarluni amerlanerit ajunngitsumik siunertaqarlutik iliuuseqarsimasut.

- Kalaallit qallunaatit naligisatut isigineqanngillat, paasisassaallutilli illersorneqarlutillu. Tamanna ingasaassilluni paarsiniarneruvoq sianiilliornerullunilu, oqarpoq, suliniummi meeqqanik 21-inik oqaloqateqarsimalluni.

Ilaquttaminnit immikkoortinneqarput. Kinaassusaannik innarliineruvoq annertooq, ilaatigut anaanaasorluunniit attaveqarfigisinnaanagu. Oqaaserisaannik arsaarneqarnermikkut tamanit arsaarneqarput, Tine Bryld oqarpoq.

Filmi Eksperimentet unnugu Danmarkimi takuteqqaarneqassaaq. Takuteqqaarneqarnerani ilaaput Kunngissakkut. Sapaatip akunnerata ingerlanerani filmi inuinnarnit takuneqarsinnaalissaaq soorlu katuami Danmarkimilu filmertarfinni arlaqartuni. Maannamut filmi tusagassiuutini naqitani elektroniskiusunilu sammineqaqaaq. Naliliisartut naliliinissaat pissanngatigineqarpoq.

Powered by Labrador CMS